Шархан Қазығұл «Күлпет»: кітап тұсаукесері

  • 19.05.2023

18 мамыр күні Абай атындағы кітапханада Шархан Қазығұловтың «Күлпет» кітабының тұсаукесері өтті. Шархан Қазығұл – қазіргі қазақ журналистикасында өзіндік стилімен ерекшеленетін танымал тұлғалардың бірі.
Шараға «Дәстүрге жол» аналар қоғамдық бірлестігінің мүшелері, жазушылар және қоғам қайраткерлері Қ.Нұрқасым, М.Жанболатов, М.Сұлтанбеков, М.Оспанов, А.Бейсембеков, педагогикалық колледж студенттері, мектеп мұғалімдері, мәдениет басқармасы мен кітапхана мамандары, БАҚ өкілдері қатысты.
Кітаптың тұсаукесері дәстүрлі түрде қызыл лента қиюмен басталып, мәдениет бөлімінің маманы Т.Б. Берікбекова мен №16 мектептің қазақ тілі мен әдебиеті пәнінің мұғалімі Г. Ағзамқызының құттықтауымен жалғасты.
Тұсаукесер кешінің жүргізушісі Б.Игілік романның жан азабы, Отанға деген сүйіспеншілік және өзін-өзі тануға деген ізденістер туралы екенін айтып, тұсауы кесілген кітаптың қысқаша мазмұнын ашты. Ал толығырақ айтсақ, романның бас кейіпкері Әбужан Райысовтың туған жеріне, Қазақстанға оралуы жайлы.
Кітапқа әдеби бағаны Қ.Нұрқасым мен М.Оспанов берді. Қ.Нұрқасым бұл романның қазіргі замандағы маңызын атап өтіп, әсіресе романдағы табиғат пен адам суреттелуіне тоқталып, өзінің жас кезі романның кейбір сюжеттерімен үндесіп жатқаның еске алды. М.Оспанов романға берген бағасында автордың қазақ тілінен өзіне де беймәлім сөздерді қолданып, сол арқылы қазақ тілінің көкжиегін кеңейтіп отырғанын, мұның қазіргі кезеңде аса маңызды екенін атап өтті.
Кітап авторы кітаппен жұмыс істеу барысы, романның идеясын, сюжетін таңдау, кітаптың атауы туралы естеліктерімен бөлісті. Ол өзінің «Күлпет» романының байқауға қалай түсіп, жеңімпаз атанғаны туралы, өз өмірінен көптеген қызықты оқиғаларды айтып берді.
Тұсаукесер қонақтары көптеген сұрақтар қойып, оларға кітап авторы ынтамен жауап берді, автор мен көрермен арасындағы әңгіме қызықты болды.
Шара көрермендеріне тақырыпқа сай мерзімді басылым беттеріннен ұсынылған «Қаламгердің жүрегі – халықтың жүрегі» атты көрме таныстырылды, көрмеге Шархан Қазығұлдың түрлі тақырыпта жазған мақалаларынан құралған басылымдар сонымен қатар, авторлар Архат пен Фарида Оразғалиевтардың, Назархан Сәкеннің қолданбалы өнерінің жәдігерлерімен толықтырылды, бұл қолдан жасалған элементтер, түрлі дыбыстар мен форматтағы музыкалық аспаптар, сондай-ақ асқан шеберлікпен жасалған аттың ер-тоқымы.