«Тарихи тұлғалардың қайраткерлік қызметтері»: өлкетану оқулары
Биылғы жылы Алаш зиялылары Шәкәрім Құдайбердіұлының туғанына 165 жыл, Отыншы Әлжановтың туғанына 150 жыл, Халел Досмұхамедовтың туғанына 140 жыл, Халел Ғаббасовтың туғанына 135 жыл, Ыдырыс Мұстанбаевтың туғанына 125 жыл толуына орай «Алаш» жобасы аясында 24 мамыр күні «Тарихи тұлғалардың қайраткерлік қызметтері» тақырыбында қаламыздағы М.О.Әуезов атындағы педагогикалық колледж студенттеріне арналып өлкетану оқуы ұйымдастырылды.
Өлкетану оқуларына тарихшылар, өлкетанушылар, мамандар шақырылды. «Шәкәрім» университетінің Тарих және құқық кафедрасының профессоры, тарих ғылымдарының кандидаты тарихшы Амантай Исин Шәкәрім қажының өмірдеректеріне терең тоқталып, қуғын-сүргін кезеңдеріндегі тағдыры туралы тың ақпараттар берді. Шәкәрімнің өмірлік қағидаларын, жалпы өз өмірі жайында мағлұмат беретін шығармасы – «Мұтылғанның өмірі» атты поэмасы екендігін баса айтты. Қазіргі кезде Шәкәрім қажының қойын дәптері, үш фотосы сақталғандығын баяндады.
Отыншы Әлжанов туралы Тарих және құқық кафедрасының профессоры, тарих ғылымдарының кандидаты Каримов Мұхтарбек Қарпықұлы алаш зиялысы хақында беймәлім беттеріне тоқталып өтті. Сонымен қатар Отыншы Әлжановтың отбасына кеңінен тоқталды. Алаш зиялысына 2016 жылы Үржар ауданында ескерткіш орнатылғандығын атап айтты.
«Әлихан Бөкейханов» атындағы университетінің халелтанушы ұстаз Райса Төлеуқызы жерлесіміз, алаш зиялысы Халел Ғаббасовтың өмір жолы мен қайраткерлігіне тоқталып тың ақпараттармен бөлісті.
М.Өтемісов атындағы Батыс Қазақстан мемлекеттік университетінің тарих ғылымдарының кандидаты, доцент, Альфия Сабырғалиқызы қонақта болып, қазақтан шыққан алғашқы дәрігерлердің бірі Дәулетшах Күсепқалиевтың қоғамдық-саяси қызметі туралы өз ойымен бөлісті.
Сондай мәдени шарамыздың қонағы Ә.Бөкейханов университетінің оқуытушысы Еркін Рахметуллин алаш қайраткерлері Халел Досмұхаметов пен Ыдырыс Мұстанбаевтардың қайраткерлік қызметтері мен Алаш үкіметіне қосқан үлестеріне тоқталды.
Шарада алаш зиялыларына арналған слайд шоу көрсетілді.
