Біз жаз мерекесін қарсы аламыз: көңілді ойын алаңы
Халықаралық балаларды қорғау күнін мерекелеу аясында 2023 жылғы 1 маусымда кітапхана алдындағы алаңда балалар әдебиеттері бөлімінің қызметкерлері №17, №34 орта мектептерінің бастауыш сынып оқушылары, «Тұлпар» балалар шағын орталығы және кітапхананың жас оқырмандары арасында «Біз жаз мерекесін қарсы аламыз» атты мерекелік ойын бағдарламасын ұйымдастырды.
Бүкіл әлемде 1 маусым – Балаларды қорғау күні ретінде 1949 жылдың қараша айында Халықаралық демократиялық әйелдер федерациясының арнайы сессиясында қабылданып, халықаралық мейрамдардың бірінен саналады.
Көңілді ертегі кейіпкерлері қарсы алған шарада балдырғандар Халықаралық балаларды қорғау күнін мерекелеу тарихымен танысып, таңғажайып ертегілер әлемін бейнелейтін ашылмалы кітаптар, танымдық энциклопедиялар, фантастикалық, графикалық кітаптармен жасақталған кең көлемді иллюстративті кітап көрмесіне шолу жүргізілді.
Шара барысында балалар «Қол күрес», «Допты шеңберге лақтыру», «Бөгеттерден өту», «Теңге алу» және т.б. түрлі эстафеталық ойындарға белсене қатысып, шағын сыйлықтарға ие болды. Мерекелік концертте №22 орта мектептің 3 сынып оқушысы Иісбек Зерде «Аяулы ана», №31 орта мектептің 5 сынып оқушысы Қайроллаева Малика «Көңілді ноталар» әндерін шырқады, ал «Тұлпар» балалар шағын орталығының «Айгөлек» тобының бүлдіршіндері билеген испан және көгершін билері, М.О.Әуезов атындағы педагогикалық колледжінің студенттері дайындаған флешмоб билері көпшіліктің көңілінен шығып, зор қошеметке бөленді.
Кітапхана кәсіподағының және кітапхана директорының орынбасары Гүлмира Тоқтарханқызы Нұғыманованың қолдауымен өткен мерекелік шара соңы кітапхана әкімшілігі тарапынан табысталған алғыс хаттар марапатымен аяқталды.