Нәубет жылдар шежіресі: тарихи лекция

Абай атындағы облыстық әмбебап кітапханасында «Нәубет жылдар шежіресі» атты дәріс өтіп, шараға қатысқан қаламыздағы “Innoverse Semey” ЖШС жалпы білім беретін мектебінің оқушылары тарихи лекция тыңдап, қазақ тарихындағы қаралы кезең деректерімен таныс болды.
Лекция барысында кітапхана қызметкері ХХ ғасырдың басында революция, азаматтық соғыс, ақтар қашып, қызылдар қуған, тонау, ашаршылық, тәркілеу, қуғын-сүргін зардаптары сияқты сұрапыл нәубетті бастан кешіріп, «мың өліп, мың тірілген» қазақ халқының өткен тарихы жөнінде терең ақпарат берді.
Халқымыз басынан өткерген зауал заман нәубеті мен төнген аштық азабынан қырылған халықтың сол заманда көрген бейнетін, тоталитарлық саясаттың қысымын айшықтайтын сол заман тынысын бейнелейтін кітапхананың сирек мерзімді басылымындағы мақалалар түпнұсқа дереккөздер болып табылады.
Сол қаралы кезеңнің құрбандары, сотсыз-үкімсіз, жазықсыз атылған қаншама жан осы туған қаламыз Семейде әлі күнге ақталмай отыр. Олардың ішінде Қарауылда көтеріліс жасағаны үшін тұтқындалып, қалаға жаяу айдап әкелінген, Түйемойнақ аралында атылып, мәйіттері көмілген 70 кісі де бар. Әлі күнге дейін аты-жөндері де толық анықталмаған, өздері де ақталмаған.
Шараға қатысушы оқушы жастар нәубет жылдар шежіресінен терең мағлұматтар алып, кітапханадан өздеріне қажетті тарихи дәріс қабылдап тарасты.