Қазақ даласының бірегей теноры: кітап көрмесі

2023 жылдың 22 маусымы күні белгілі әнші, Қазақстанның халық әртісі, ұстаз-тәлімгер, профессор, Ұлы Отан соғысының ардагері, жерлесіміз Бекен Бәкенұлы Жылысбаевтың туғанына 100 жыл толуына орай «Қазақ даласының бірегей теноры» тақырыбында кітап көрмесі ұйымдастырылды. Кітапхана пайдаланушылары мен оқырмандарына халық әншісінің өмірі мен шығармашылық қызметін қамтитын кітаптар мен мерзімді басылымдардан материалдар ұсынылды.
Бекен Жылысбаев – қазақтың халық әндерін, орыс классиктерінің және шетел композиторларының ән-романстарын орындаушы. Ол өзінің әдемі тенорымен қазақ және шетел композиторларының шығармаларын асқан шеберлікпен орындап, биік ән өнерімен жұртшылықты тәнті етті. Оны қазақ өнерінің академиялық әншілік өнерінің атасы деп атаған. Б. Жылысбаев – Алматы консерваториясының (қазіргі Құрманғазы атындағы Қазақ ұлттық консерваториясы) оқытушылары арасында бірінші болып профессор атағын алды. 1951 жылдан консерваторияда оқытушы, жарты ғасырға жуық жеке ән кафедрасын басқарды. Талантты ұстаз Бекен Бәкенұлы әлемдік деңгейдегі әншілердің тұтас бір галактикасын өсірді, ұлттық вокалды әншілік мектеп құрды, Қазақстанда опера жанры мен хор өнерін дамытты. Ол өнердің құдіретін біліп сезінді, ал музыка оның табиғи элементі болды. Бекен аға ауыр жарақатына қарамастан, соғыс жылдары өмір мен өлімнің арасында жүрсе де, тек бейбітшілік, татулық, бақыт жайлы ән салды.
Көрмеге қойылған Б. Қожырұлының «Қазақ елінің атақты музыка өнерпаздары», А. Бейсембековтың «Өнермен үлгілеген өмірлер», М. Майшекиннің «Көркемөнер шеберлері» кітаптарі мен «Егемен Қазақстан», «Дидар», «Ертіс өңірі» газеттері және басқа да басылымдардағы мақалалар оқырмандар тарапынан ерекше қызығушылық тудырды.