Кітапханалар мен мұражай қорларындағы ұлттық мұра жәдігерлерінің библиографиялық сипаттамасын жасау жолдары: семинар

Ағымдағы жылдың 26 маусымында Алматы қаласында, Ғылым Академиясының Орталық ғылыми кітапханасы ұйымдастырған онлайн және офлайн форматында – «Қазақстанның материалдық емес мәдени мұрасы: кітапханалар мен мұражай қорларындағы ұлттық мұра жәдігерлерінің библиографиялық сипаттамасын жасау жолдары» – атты Материалдық емес мәдени мұраны қорғау туралы конвенцияның 20 жылдығын қолдау мақсатында семинар өткізілді.
Семинар «Қазақ мәдени мұрасының ауызша және жазбаша көздері», «ЮНЕСКО-ның (Жапония) Осакадағы орталығының халықаралық мәліметтер базасы негізінде Азия-Тынық мұхиты аймағы елдерінің ғылыми зерттеу тәжірибесі», «Кітапханалар мен музей қорларындағы тарихи маңызы бар құнды мұраларды анықтау», «ЮНЕСКО-ның (2003 ж.) Конвенциясы бойынша Қазақстан Ұлттық комитетінің Материалдық емес мәдени мұраны жүзеге асыру 2023-2024 ж. жобасы» тақырыптары бойынша жұмыс жасады.
Семинар ҚР ЮНЕСКО және ИСЕСКО істері жөніндегі Ұлттық комиссиясының Бас хатшысы Ә.Байсабаева ханымның құттықтау сөзімен ашылды. Халықаралық шараға Жапониядан, Ресейден және еліміздегі сирек қорлары бар архивтер, қорық-мұражайлар мен кітапханалар, Ғылыми реставрация орталығы, Азия және Тынық мұхиты аймағының материалдық емес мәдени мұрасы бойынша ЮНЕСКО-ның халықаралық ғылыми-зерттеу орталығы өкілдерінің қатысуымен өтті.
Халықаралық семинарға біздің кітапханадан мерзімді басылымдар бөлімінің басшысы Ж.Ә.Манжибаева «Абай кітапханасы: сирек кітаптар ескерткіштері» тақырыбында баяндамамен қатысып, сирек қорымыздың асыл мұраларымен таныстырды.