Қазақтың ұлы перзенті: әдеби-ақпараттық сағат

3 тамызда Абай атындағы облыстық кітапхана ұжымы Семей қаласындағы Қарттар мен жалпы үлгідегі мүгедектерге арналған медициналық-әлеуметтік мекемесінде Абай күніне орай, Абай Құнанбаевтың шығармашылық қызметіне арналған: «Қазақтың ұлы перзенті» тақырыбында іс-шара өткізді.

Шараға қатысушылар Абайдың өмірбаяны, оның қоғамдық және аудармашылық қызметімен, абайтану ғылымының дамуымен таныса отырып,жер аударылған П.Лобановскийдің, суретшілер Ә.Қастеев, Н. Өтепбаевтың, көркем кесте шеберлері Григорий мен Анна Аткниндердің ақын жайында туындыларын қызықтап, Е.Сидоркиннің  М.Әуезовтің «Абай жолы» роман-эпопеясына негізделген иллюстрациялары мен ұлы ойшыл туралы портреттерін тамашалады.

Шараға қатысушылар әсіресе Абайдың әкесі – Құнанбай, анасы – Ұлжан, ұлдары – Ақылбай, Мағауия,Тұрағұл жайындағы ақпараттарға аса ынтамен тыңдап, назар аударды. Әдеби-ақпараттық сағат бейнеролик, слайдтармен толықтырылды.

Шара соңында  қатысушылар ақын ғұмырнамасынан сыр шертетін «Абай мұрасы – адамзаттың асыл қазынасы» тақырыбында арнайы  жасақталған кітап көрмесімен танысты.