Тіл – халық қазынасы: ақпараттық сағат

2023 жылдың 7 қыркүйегінде Қазақстан халықтарының тілдері күніне орай Абай атындағы әмбебап кітапханада қаламыздағы №2 орта мектебінің оқушылары үшін қазақ, орыс және ағылшын тілдерін жетілдіру мақсатында мәдени іс-шара ұйымдастырылды. Бұл мереке ағартушы, тіл жанашыры, әдебиеттанушы, ақын, публицист, аудармашы, қоғам қайраткері – Ахмет Байтұрсынұлының туған күніне арналған.
Іс-шара мақсаты: халықтың мәдени мұрасын зерделеу арқылы білімге, тіл үйренуге қызығушылықты ояту, патриоттық сезімді қалыптастыру. Іс-шараға қатысушылар қазақ, орыс, ағылшын тілдері туралы қызықты деректермен танысты. Одан кейін қатысушылардың назарына тілдің мәдениетін, өзіндік ерекшелігін, тұрмыс-тіршілігін танытатын, тілге рең, сыр беретін омонимдер, баламалар, мақал-мәтелдер, жұмбақтар сайысы ұсынылды. Бұл сайыста қатысушылар қазақ, орыс, ағылшын мақал-мәтелдері бойынша білімдерін көрсетті. Ең қызықтысы «Жаңылтпаш» сайысы болды, оған қатысушылар 3 тілде жаңылтпаштарды жылдам, әрі анық оқуы керек болды.
Сайыста Т.Кремер, Е.Исаев, Р.Қадыров, К.Телегенова, А.Шигабудинова сынды оқушылар өз білімдерін алға тартты. Іс-шараның барлық белсенді қатысушылары ынталандыру сыйлықтарымен марапатталды.
Іс-шара соңы тілдер күніне арнайы жасақталған кітап көрмесін тамашалаумен аяқталды.