“Kitap Time-2023” :Қолөнер шеберлерінің көрмесі

15 қыркүйек күні Абай атындағы кітапханада “Kitap Time-2023” фестивалі аясында қолөнер шеберлерінің көрмесі ұйымдастырылды. Көрмеге қолөнер шеберлері Абылайхан Асылбай, Сәкен Назарханның бұйымдары қойылды.
Көрмеге Абылайхан Асылбай жасаған дулыға, сауыт-сайман, қару-жарақ, садақ, қылыш, қалқан, қамшы, айбалта, шоқпар, ұлттық әшекейлер т.б. бұйымдары қойылды. Бұл бұйымдарды қолөнер шебері өз қолымен қарапайым қолда бар материалдардан жасап шығарады. Абылайхан Асылбай жауынгерлердің сауыт-саймандарынан бөлек ол әйелдердің ұлттық әшекейлері мен тұрмыстық заттарын дайындап, кез келген темір бұйымға екінші өмір сыйлай алады.
Сонымен қатар қазақ халқының ұлттық бұйымдарын жасайтын қолөнер шебері Сәкен Назарханның жасаған бұйымдары қазақтың халықтық аспаптары қобыз, домбыра, дәстүрлі қару-жарақтары мен сауыттары, ат әбзелдері, ағашқа ойылып салынған бұйымдары қойылды.
Ұлттық қолөнерді дамыту, қолөнер шеберлеріне қолдау көрсету, олардың жасаған бұйымдарын халық арасында кеңінен насихаттау мақсатында өткізілген көрмені тамашалаған кітапхана оқырмандары ұлттық нақышта жасалған бұйымдарға деген қызығушылықтарын байқатты.