Жас ақындар кездесуі: поэзиялық ашық микрофон

Ағымдағы жылдың 15-ші қыркүйегінде «KitapTime-2023» ІІ жалпы республикалық кітап фестивалі болды. Аталмыш фестиваль аясында Облыстық Абай атындағы әмбебап кітапханасында түрлі іс-шаралар өтті. Соның бірі – поэзиялық ашық микрофон форматындағы жас ақындар кездесуі.
Шараға Мұхтар Әуезов атындағы педагогикалық колледждің, Шәкәрім атындағы университеттің және Әлихан Бөкейханов атындағы университеттің «Қазақ тілі мен әдебиеті» мамандықтарында білім алып жатқан және студенттермен басқада кітапханамыздың өлеңсүйер оқырмандары қатысты.
Өлең өлкесінде қалам тербеп жүрген жас ақындарымыз өздерінің ауыл, табиғат, махаббат және патриоттық тақырыптағы өлеңдерін оқыса, өлеңсүйер қатысушыларымыз Абай Құнанбайұлы, Шәкәрім Құдайбердіұлы, Мұқағали Мақатаев, Төлеген Айбергенов, Мұхтар Шаханов және т.б. ақындардың шығармаларын мәнерлеп оқыды.
Бүгінгі күні жас ақындарға үлгі болып, жол сілтеп, бағыт беріп жүрген ақын Бауыржан Игілік жиынға қатысушы жастар үшін өзінің «Тағдыр көзі» кітабынан бірнеше өлең оқып берді.
Ашық микрофонға ашылып өлең оқып, алтын уақыттарын поэзияға арнап келген жастар кештен үлкен әсер алып, тамаша көңіл-күймен тарқасты.