А.Бейсембековтің «Қазақ сатирасының антологиясы», «Сақ-сақ күлген сатира»: кітаптарының тұсаукесері

«KitapTime-2023» ІІ жалпы республикалық кітап фестивалі аясында 15 қыркүйек күні Облыстық Абай атындағы әмбебап кітапханасында мәдениет қайраткері, сатирик Аймұханбет Бейсембековтің «Қазақ сатирасының антологиясы», «Сақ-сақ күлген сатира» кітаптарының тұсаукесері өтті.
Шараға қаламыздың зиялы қауым өкілдері, Шәкәрім университеті мен педагогикалық колледж студенттері, мәдениет басқармасы мен кітапхана мамандары, БАҚ өкілдері қатысты.
Кітапхана маманы, ақын Бауыржан Игілік сыншыл-сатирик, сазгер, күміс көмей әнші Аймұханбет Бейсембековтің шығармашылығымен таныстырып, қатысушылар назарына «Қазақ фильм» түсірген сатирик-ақынның «Отаным жаса» бейнеклипі ұсынылды.
Кітаптың дәстүрлі түрде қызыл лентасын Шәкәрім университетінің профессоры, вет. ғ. д. ҚР білім беру ісінің құрметті қызметкері, Қазақстан Ұлттық жаратылыстану ғылымдары Академиясының академигі – Тоқаев Зейнолла Қалымбекұлы, Семей қаласы ардагерлер кеңесінің төрағасы – Мұрат Әлин және ҚЖО Семей филиалының Төрағасы – Мерей Қарт қиды.
Сатира жанрында жазылған кітаптың тұсаукесерінде өнер майталманының шәкірттері жанды дауыста ән айтып, достары құттықтау сөздерін айтты.
Қаламгердің бұл жинағына сықақ әңгімелер мен өлеңдер, әзіл-қалжыңдар, эпиграмма мен пародиялар, фельетондар топтастырылған. Әнші, сатирик Аймұхамбет Бейсембековтың айтуы бойынша ол тақырыпты таңдап, зерттеуі бекер емес, себебі қазақ әдебиетінде сатира жанрының біз білмейтін қырлары әлі де көп.
Шара соңында қатысушыларға А.Бейсембековтың кітаптары мен мерзімді басылым беттеріннен жасақталған «Сан қырлы қаламгер» атты көрме таныстырылды.