Заманауи кеңістіктегі кітапхана жұмысы: тәжірибе алмасу

Абай атындағы кітапхананың 140 жылдығы және Еңбек күні қарсаңында «Өрлеу» БАҰО АҚ біліктілікті арттыру курстары аясында қала және облыс мектептерінің кітапханашылары кітапханамызға тәжірибе алмасу мақсатында келді.

Кітапханашылар бір ғасырдан артық тарихы бар кітапханамыздың бөлімдерімен, ақпараттық қызметтерімен танысып, Абайдың рухани орталығы мен Алаш орталығында болды.

Абайдың рухани орталығында болған кітапханашы мамандар 18-19 ғасырда баспа көрген Абай заманындағы сирек басылымдарды, оның ішінде Абай оқыған кітаптарды, аймақ зерттеушілерінің еңбектерін, әлем әдебиеті жауһарларын, Абайдың әлем тілдеріндегі шығармаларын көріп, керемет әсер алды. Атап айтқанда, Э.Э. Ухтомскийдің «Путешествие на Восток Его Императорского Высочества государя наследника Цесаревича», 1790 ж. жарық көрген М.В. Поллионның «Об архитектуре», 1881 ж. «Құран» кітаптары қатысушылардың ерекше қызығушылығын тудырды.

Сонымен қатар «Алаш» электронды кітапханасына шолу жасалды. Қатысушылар назарына Қазақстанның, алыс-жақын шетелдердің мұражай қорларынан, мұрағаттарынан, жеке мұрағаттардан Алаш қозғалысының тарихына қатысты құжаттар, Алашорда қайраткерлері мен олардың отбасы мүшелері туралы толық мәтінді материалдар ұсынылды.

Практикалық бөлімде кітаптарды электронды каталогқа енгізу және одан әдебиеттерді іздеу, «Оқырмандар» электронды базасына жаңа оқырмандарды тіркеу, кітапхана қорының есебін жүргізу бойынша кеңестер берілді. Мектеп кітапханашылары кітапханада жұмыс істеп жатқан жобалармен де танысты.

Іс-шараның нәтижесінде мектеп кітапханашыларының Абай тұлғасы туралы, қазіргі жағдайдағы кітапхана жұмысының формалары мен әдістері туралы, жалпы заманауи кітапхананың қызметтері туралы білімдері айтарлықтай кеңейе түсті.