Николай Носов шығармаларындағы көңілді кейіпкерлер: атты квест-ойын

2023 жылғы 16 қарашада балалар әдебиеті бөлімінің қызметкерлері атақты орыс жазушысы, сценарист, драматург Николай Носовтың туғанына 115 жыл толуына орай жас оқырмандарға жазушының шығармаларын дәріптеу мақсатында, №6 мектеп-гимназиясының 2 сынып оқушылары арасында «Николай Носов шығармаларындағы көңілді кейіпкерлер» атты квест-ойынын ұйымдастырды.
Н. Носов өте жағымды, күлкілі әңгімелер жазды және бала кезінен үлкен өнертапқыш болды, оның қысқа да нұсқа, тиянақты шығармалары балаларда сыншылдық, еңбекке құштарлық секілді қасиеттерге оятуға көп көмегін тигізді. Автордың «Дымбілмес және оның достарының оқиғасы», «Дымбілмес Күн қаласында», «Дымбілместің айға саяхаты» атты танымал трилогиялары және т.б. шығармалары жарыққа шықты.
Іс-шара барысында кітапхана қызметкері жазушының өмірі мен шығармашылығы жайлы қысқаша мәліметтер беріп, бес тапсырмадан тұратын квест-ойын ұйымдастырды. Ойынның басты шарты- викторина сұрақтарына жауап бере отырып, пазлдар жинау және қазына жасырылған хаттың құпиясын шешу. Шара барысында балдырғандар ойын ережелерін талдап, берілген тапсырмаларға сәйкес әрекет етіп, барлық жұмбақ пазлдарды жинап қазынаны тапты, ол қазына автордың әңгімелері мен ертегілері топтастырылған үлкен кітап болды.
Сондай-ақ оқушыларды шараға жақсы дайындаған үшін кітапхана әкімшілігі тарапынан бастауыш сынып мұғалімі Рысалды Орынбасарқызы Қалиеваға алғыс хат табысталды, балдырғандар жазушының шығармаларымен, әңгімелерінде кездесетін көрнекті заттармен топтастырылған «Әлемдегі ең көңілді жазушы» атты кітап көрмесін тамашалап, жақсы әсермен тарқасты.