Қара өлеңнің қоңыры: шығармашылық кеш

Абай атындағы облыстық кітапханада Қазақстан Жазушылар одағының Абай облыстық филиалымен бірлесіп, ақын, халықаралық «Шабыт» шығармашылық жастар фестивалінің лауреаты Ербол Алшынбаймен шығармашылық кездесу өтті.
Шәкәрім университетінің, М.Әуезов атындағы педагогикалық коледжінің студенттері және №30 орта мектептің мұғалімі, Ақселеу Сейдімбеков атындағы байқаудың жеңімпазы Сағындықова Жансая жетекшілік ететін 5 «Г» сыныптың оқушылары Ербол Алшынбайдың өлеңдерін нақышына келтіре оқып, ал қаламыздың жас ақындары Жасұлан Мақаев пен Темірлан Темірбаев өз өлеңдерін ақын кешіне арнады.
Ақын Ербол Алшынбай «Шәкәрімнің Шыңғыстаумен қоштасуы», «Тарбағатай», «Топырақ астындағы жылқылар», «Бәсіре» өлеңдерін оқып, мемлекеттік қызметте жүріп шығармашылықпен айналысуы, «Шабыт» шығармашылық фестиваліндегі жеңісі, кәсіби сынды қабылдауы, қазіргі қазақ әдебиетінің сұранысы, Мағжан Жұмабаевтың шығармашылығына көзқарасы,, «Жоғалған таулар» поэмасының жазылу себебі сынды қатысушылар тарапынан қойылған сұрақтарға жауап берді. Өзінің «Жоғалған таулар» кітабын Абай кітапханасының қорына сыйға тартты.
Кеш барысында ақын, Мемлекеттік сыйлықтың лауреаты Тыныштықбек Әбдікәкімұлы, өнертанушы Құсмилия Жырғалұлы, абайтанушы, филология ғылымдарының докторы, профессор Бауыржан Ердембеков, еңбек ардагері Қадыр Досымжанов және Қарағандыдан келген ақын Жанат Жаңқашұлы қатысып ақынға сөз арнап, шығармашылық табыс тіледі.
Арқа өңірінен келген кеш қонақтары дәстүрлі әнші Саян Мұздыбай Тұрсынғазы Рахимовтың «Мен сені сағынғанда», қобызды серік еткен әнші Бөкен Жігер «Қайтейін қайран қарт елім» әндерін шырқады.
Кешке қатысушылар Әміре Қашаубаев атындағы филармонияның әншісі, әнші-композитор Тұрсынғазы Рахимовтың төл шәкірті Жасұлан Тәжиевтің орындауындағы ән атасы Біржанның әнін тыңдап, осы филармонияның әншілері Ә. Серіков мен А. Оранбекұлы орындауындағы қазақ күйшілерінің шығармаларынан күй тартысын тамашалады.
Кеш соңында Абай облысының мәдениет, тілдерді дамыту және архив ісі басқармасының басшысы Идрисова Назира Тасболатқызы және М.Әуезов атындағы педагогикалық коледжінің директоры Шаған Алдамжарқызы Жанаева сөз алып, елге келген ақынға рахмет айта отырып, алғыс хат табыстап, сый-сияпат жасады. Кеш қонақтары ақынмен ескерткіш суретке түсіп, ұйымдастырылған маңызды шараға қатысқандарына алғыстарын білдірді.