С. Торайғыровтың «Қамар сұлу» романы: оқырмандар конференциясы

Ағымдағы жылдың 28 қараша күні Абай атындағы облыстық әмбебап кітапханасында қазақтың ақыны, ағартушы-демократы Сұлтанмахмұт Торайғыровтың (1893–1920) туғанына 130 жыл толуына орай, оқырмандарға қаламгердің шығармашылығын кеңінен насихаттау мақсатында оқырмандар конференциясы өтті.
Аталған шараға «Қамар сұлу» шығармасын талқылау үшін Семей қаласының Шәкәрім атындағы университеті КеАҚ филология факультетінің КЯЛ-101 -тобының студенттері мен қазақ филологиясы және журналистика кафедрасының профессоры – Тоқсамбаева Айман Омарқанқызы қатысты.
Машабаева Арайлым , Серікқали Айдана автордың өмірбаяны, шығармашылығы, тақырып өзектілігі, келер ұрпаққа берер үлгісі туралы тақырып қозғап, баяндама жасады.
Қамар сұлу — Сұлтанмахмұт Торайғыровтың 1914 жылы шыққан романы, жартылай өлеңмен, жартылай прозамен жазылған. Жазушы шығарма фабуласын Алтай елінде болған кездерінде ел аузынан алған, романға өмірде болған уақиғалар негіз болған. Романының идеясы Қамар мен Ахмет арасындағы махаббаттың трагедиясынан ғана туындамайды. С. Торайғыров әйелдер тағдырын адамдық құқығын ескермеген қоғамдығы түрлі әлеуметтік күштердің осы проблемаға қарым-қатынасын да бейнелеп көрсетеді.
Конференция барысында шығарманы бүгінгі күнмен салыстыра отырып, әлеуметтік теңсіздік мәселесіне тоқталып, әр кейіпкерге жекелей мінездеме беріп, оның болмысын ашып жастардың ой-пікірлері ортаға тасталды.
Шарада Шәкәрім университетінің студенттері белсенділік танытып, алдағы уақытта басқада шығармаларды талдауға ынталарын білдірді. Бір сәт ескі қазақ қоғамының өміріне көз жүгірткен қатысушылар үлкен ой, рухани тебіреніспен тарқасты.