Мағжан Жұмабайұлының ғылыми және саяси аудармалары: онлайн-дәріс

2023 жылдың 5 желтоқсанында Абай атындағы облыстық әмбебап кітапханасында Zoom платформасында, «Алаш» жобасы аясында, Ә.Бөкейхан атындағы ҒЗИ ғылыми қызметкері, қазақтың алғашқы баспасөзі мен оқулықтарын зерттеуші Мырзағали Абайдың қатысуымен «Мағжан Жұмабайұлының ғылыми және саяси аудармалары» (Мәскеудегі шығармашылық қызметі негізінде) атты онлайн-дәрісі өтті.
Шара қонағы Алаш қозғалысының қайраткері, ақын, қазақ әдебиетінің жарқын жұлдызы Мағжан Жұмабаевтың шығармашылығына қысқаша тоқталып, Мәскеу қаласында өткізген 1923-1927 жылдардағы атқарған еңбектеріне шолу жасады.
Мағжан Жұмабаев Мәскеудегі жылдарында Алаш қозғалысының көсемі Әлихан Бөкейханов және Нәзір Төреқұловтармен бірлесе отырып, аударма ісіне көп үлесін қосқан. Абай мырза өз баяндамасында Мағжанның қалам тартқан еңбектерін ғылым саласы бойынша жіктеп, әрбір еңбегіне қысқаша сипаттама беріп өтті. Атап айтсақ, оқулық ішінде – «Күркіреу. Найзағай. Электр» атты еңбегі әлі күнге дейін өзектілігін жоғалтпаған екен. Әдеби аудармаларында – М.Горькийдің «Сұңқар жыры», «Төрт әңгімесіне», педагогикалық басылымда «Педагогика» оқулығына, Коммунистік партия жарғылары мен қаулыларында – «Кеңестік республикалар одағының мұғалімдерінің І тобының қаулылары», шаруашылық тұрмысқа қатысты – «Қарыз серіктестігі оның шаруаға пайдасы», тарихи тақырыпқа байланысты жасаған аудармаларына жеке-жеке тоқталды. Осы кітаптардың таралымы 1000 данадан бастап 100 000 дейін жететіндігін, сонымен қатар сол замандағы бағасына дейін айтып өтті.
Жоғарыда әңгімеленген еңбектерінің барлығы Алматы қаласындағы Қазақстан республикасының ұлттық кітапханасының қорында сақталғандығын тілге тиек етті.
Шара соныңда қатысушылардың сұрақтарына толық қанды жауабын берді.