Шәкәрім әлемі: әдеби қонақжайлылық

8 желтоқсан күні Шәкәрім Құдайбердиевке арналған Абай кітапханасы мен М.Төлебаев атындағы музыкалық колледждің бірлескен іс-шарасы өтті.
Орыс тілі мен әдебиеті пәнінің мұғалімі Д.Т.Ақшалова Шәкәрімнің өмірі туралы презентация жасап, балалар оқып дайындалып келген Е.Сыдықовтың өнегелі адамдар өмірі сериясымен шыққан «Шәкәрім» кітабы бойынша викторина өткізді.
Кітапхана маманы студенттерді кітапхана қорындағы әдебиеттермен таныстырып, ақын-философтың өмірі мен шығармашылығы туралы әңгімеледі. Жерлестеріміздің: Е.Сыдықовтың орыс және қазақ тілдеріне шыққан «Шәкәрім» кітаптарына, «Шәкәрім» энциклопедиясына, М. Сұлтанбековтің «Абай и Шакарим в 21 веке», «Поэтическое вдохновение: Абай, Шакарим и Мухтар», А.Омаровтың «Шәкәрімнің өмірбаяны», Д.Омаровтың «Шәкәрім шыңы», «Шәкәрімнің «Үш анығы», Б.Щербаковтың «Звездная степь Жидибая» кітаптарына тоқталып өтті.
Студенттер «Еңлік-Кебек» спектаклінен өлеңдер мен театрландырылған үзінді дайындаса, 4 курс студенті Тұрғамбаев Алтынбектің орындауындағы Шәкәрімнің «Жиырма үш жасымда» әні де көрермендер назарына ұсынылды.