Еркін Шүкіманның «Көзімнің қарасы»: кітабының тұсаукесері

22 желтоқсан күні Абай атындағы облыстық әмбебап кітапханасында Абай облыстық Мәдениет, тілдерді дамыту және архив ісі басқармасының ұйымдастыруымен Дәстүрлі әнші, ҚР Мәдениет қайраткері, Қазақстанның еңбек сіңірген қайраткері Еркін Шүкіманның «Көзімнің қарасы» кітабының тұсаукесері өтті.
Кітаптың тұсауын ҚР Мемлекеттік сыйлығының лауреаты, ақын – Тыныштықбек Әбдікәкімұлы, дәстүрлі әнші, Абай ауданының құрметті азаматы, Қазақ ән өнерінің қайраткері Амангелді Жікенов, Абайдың «Жидебай-Бөрілі» мемлекеттік музей-қорығы директорының міндетін атқарушы Қайрамбаева Мейрамгүл Сейітжапарқызы кесті.
Кеш тізгінін ұстаған ҚР Мәдениет қайраткері Ерлан Төлеутай Еркін Шүкіманның өнері мен шығармашылығы жайын тілге тиек етіп, кейінгі зерттеулері мен ғылыми еңбектеріне тоқталып жиылған қауымға көптеген ақпарат ұсынды.
Сөз кезегін алған кеш иесі аталмыш кітапта ақын, ойшыл, композитор Абай Құнанбайұлының әндері мен күйлері жинақталып, домбыра бұрауына лайықталып нотаға түсірілгенін баян етті. Еңбектің басты жаңалығы – өткен ғасырдың 20-жылдарынан бастап бүгінгі күнге дейін жинақталған ақынның мұраларының түр-нұсқалары салыстырылып, бұрыңғы-соңғы жарық көрген жинақтар мен ғылыми еңбектердегі және мұрағаттардағы материалдар негізінде кеңінен ғылыми түсінік берілгені болды.
Мәдени жиында Еркін Шүкіманға «Құрмет» орденінің иегері, қоғам қайраткері Рахат Алтай, Тарихшы ғалым, тарих ғылымдарының кандидаты, профессор Кәрімов Мұхтарбек Қарпықұлы, Абай облыстық Мәдениет, тілдерді дамыту және архив ісі басқармасының басшысы Идрисова Назира Тасболатқызы, жас жазушы Қуат Қиықбай ақ тілектерін білдірсе, ҚР Халық әртісі Рамазан Стамғазиев Еркін мырзаның репертуарынан ән шырқады.
Кеш соңында Еркін мырза өзін қолдап келген өнер майталмандары мен аталмыш кітапты жазуда көп көмегін тигізген Абай атындағы кітапхана және музей ұжымына зор алғысын білдірді.