Тұлғалар тынысы: танымдық кездесу

Қаңтардың 28-күні Абай атындағы облыстық кітапхананың қабырғасында «Қыр баласы» қоғамдық қорының белсенділігімен «Тұлғалар тынысы» жобасы аясында танымдық кездесу ұйымдастырылды. Бұл жобаның алғашқы қонағы ғалым, этнограф, тарихшы Мұхаметқазы Мұхамедиұлы болды.
Жастармен кездесуде Мұхаметқазы Мұхамедиұлы 1905 жылғы Алаш қозғалысына, 1918 жылы Алаш зиялыларының Шәуешек сапарына егжей – тегжейлі тоқталып, сол заманның ауқымын, қиыншылықтарын қыр – сырына дейін бір деммен баяндап берді. Алаш қозғалысынан бастау алған және тәуелсіздікке қол жеткізу жолында аянбай еңбек еткен Райымжан Мәрсек, Мырза–Садық Құрбанқажыұлы, Зият Шәкәрімұлы сынды ұлт қайраткерлерінің рөлін айырықша айтып, жиылған жастардың зердесіне құйып берді. Ағамыз бір сөзінде «Мен Қабдештей мемлекетшіл, ұлтжанды, азаматтың арысы, классикпен бір топырақта туып, етене дос болғаным үшін маңдайыма жазылған тағдырыма дән ризамын» деді кеш қонағы.
Осылайша кеш соңында қонағымыз Мұхаметқазы Мұхамедиұлы жастарға тағылымды әңгімелерін айтып, айтары мен берері мол ақсақалымыз батасын да аямады. Кеш соңында қатысушылар аталмыш шараны тарихи кездесуге балап,естелікке суретке түсіп тарқасты.