Ауған қасіреті мәңгі есімізде: кездесу кеші

2024 жылдың 6-шы ақпаны күні Абай атындағы кітапханада кітапхана қызметкерлері «15-ақпан Кеңес әскерінің Ауған жерінен шығарылған күніне 35 жыл толуына орай «Ауған қасіреті мәңгі есімізде» тақырыбында кездесу кешін ұйымдастырды. Іс-шараға «Бизнес және сервис» колледжі студенттері қатысты. Кездесу кешіне Ауғанстанда әскери борышын өтеген интернационалист-жауынгерлер, Ауған соғысының ардагерлері – Манасов Айдар Тортайұлы, «Абай облысы, Ауғанстандағы және жергілікті соғыстардың ардагерлері мен мүгедектері» қоғамдық бірлестігінің төрағасы – Бегатов Боранбай Оразбайұлы арнайы түрде шақырылды.
Іс-шара барысында оқиғаның тарихилығы баяндалып, қыршын кеткен боздақтардың ерлігін ұмытпау мақсатында «Бір минут үнсіздік» жарияланып, тақырыпқа сай видео, слайдт көрсетілді. Кеште ардагер А.Т.Манасов, Б.О.Бегатовтар от жалынды жылдардың естеліктерімен бөлісіп, өткен өмірлеріне тоқталды.Студенттер көкейлерінде жүрген сауалдарын жолдап, жауаптар алды.Кеште Қ.Кенжебекұлы, кітапхана қызметкері М.Байжанов Ауған соғысы туралы әндер орындады. Аталмыш шараға «Тарих қойнауындағы – Ауған ақиқаты» атты кітап көрмесі арнайы түрде жасақталды.Көрмеге Ауғанстан мемлекеті, соғыстың басталуы, кеңес әскерлерінің әскери әрекеттері, интернационалист жауынгерлердің жеке естеліктерін баяндайтын кітаптар, сондай-ақ, Ауған соғысына қатысқан қазақстандықтардың қысқаша өмірбаяндары, суреттері берілген «Даңқ» энциклопедиясы, С.Акимбековтың «История Афганистана», «Когда поют солдаты», «Афганские звезды» жыр жинақтары, А.Жантасовтың «Жартасты жастанған жасақ», Ө.Күмісбаевтың «Ауғанстан достық құшағында», Б.Смағұлдың «Паншер патшасы», А.Үмбетованың «Рахмет, ұлым» т.б. кітаптар мен мерзімді басылымдардан мақалалар топтамалары, фотосуреттер қатысушылар назарына ұсынылып, шолу жасалды. Шара соңында ардагерлерге кітапхана атынан сыйлықтар табыс етілді.