Ауған соғысының жаңғырығы: кітап көрмесі

2024 жылдың 15 ақпанында Ауғанстан Демократиялық Республикасы (АДР) аумағынан Кеңес әскерлерінің шектеулі контингентінің шығарылғанына 35 жыл толды. Бұл күн елдің «ыстық нүктелерден» өткен «ауғандық» жауынгерлерге, соғыс ардагерлеріне құрмет көрсететін күн.
«Ауған соғысы» 10 жылға жуық уақытқа созылған қайғылы оқиға.
Нақтырақ айтсақ, бұл соғыс 9 жыл 1 ай 19 күнге созылды (1979 жылдың 25 желтоқсанынан 1989 жылдың 15 ақпанына дейін). 15 мыңға жуық өмірі қиылған кеңес жауынгерінің 780-і қазақтар еді.
Осы қайғылы оқиғаны және интернационалист-жауынгерлерді еске алу мақсатында Абай атындағы облыстық әмбебап кітапханасы кітапхана оқырмандары мен Абай облысына қарасты аудандық және ауылдық кітапханалардан келген кітапхана мамандарына «Ауған соғысы жаңғырығы» атты кітап көрмесін ұйымдастырды.
Көрмеде Ауғанстандағы соғыстың тарихы, себеп-салдары, интернационалдық борышын өтеген жауынгерлеріміздің ауыр жауынгерлік сынақтары туралы баяндайтын көркем және деректі туындылар мен мерзімді басылым беттеріндегі материалдар қойылды. Ә. Жантасовтың «Второй мусульманский спецназ из Казахстана», С. Әкімбаевтың «История Афганистана», «Звезды подвига. На земле Афганистана», «Афганская война. Как это было» т.б., туындылар мен «Ақиқат», «Қазақ тарихы», «Алғашқы әскери дайындық», «Семей өңірі», «Дидар», «Сарбаз», «Ертіс өңірі», «Заң» т.б. мерзімді басылым беттеріндегі мақалалар ұсынылды.