Шәкәрім оқулары: облыстық байқау

Абай атындағы облыстық әмбебап кітапханасында 2024 жылдың 16 наурызы күні ақын Шәкәрім Құдайбердіұлының шығармашылығын балалар мен жасөспірімдер арасында насихаттау мақсатында Астана қаласындағы ҚР Ұлттық академиялық кітапханасының бастамасымен «Шәкәрім оқулары» атты ақын өлеңдерін жатқа айту республикалық байқауына облыстық іріктеу кезеңі өтті. Шараны «Абай облысы білім басқармасының “Дарындылық пен қосымша білім беруді дамытудың ғылыми-әдістемелік “Дарын” орталығымен” бірлесіп ұйымдастырды.
Облыстық байқауға Абай облысына қарасты кітапханалардың жас оқырмандары, мектептің 5-8 сынып оқушыларынан барлығы 17 оқушы қатысып, өз білімдерін сынады.
«Дарын» мемлекеттік жастар сыйлығының иегері, кітапхана директоры М.Қарт, Халықаралақ байқаулардың жүлдегері Б.Игілік, ақын, алаштанушы жас ғалым, №22 мектептің ұстазы А. Қадылбек сынды қазылар алқасы қатысушылардың жетістіктерін бағалады.
Шәкәрімнің есімін алты Алашқа асқақтату мақсатында өткен байқауға қала және аудан мектептерінен іріктеліп алынған жеңімпаздар белсене қатысты. Қатысушылардың ақын шығармаларын жатқа мәнерлеп оқуы, өлеңді таңдауы және оқу шеберлігі, қазақ тілінің орфоэпиялық нормаларын сақтауы, сахнада өнер көрсету мәдениеті және қазақтың ұлттық киім кию үлгілері басты назарға алынды.
Қазылар алқасының шешімі бойынша жүлделі 1 орынды Абай атындағы мамандандырылған мектеп-гимназия интернатының 5 сынып оқушысы Әлібек Айару иеленіп, Астана қаласында өтетін республикалық байқауға жолдама алды. ІІ орынды Жарма ауданы Ақтайлақ би атындағы орта мектептің 6 сынып оқушысы Оразғазы Нұрдәулет еншілесе, 3-орынды Жаңа Семей ауданы С.Бегалин атындағы орта мектептің 7 сынып оқушысы Ақылғазина Ақерке иеленді. 1-3 орын алған жүлдегерлерге арнайы сыйлықтар берілді. Байқауға қатысқан барлық қатысушыларға сертификаттар тапсырылды.
Астана қаласында өтетін республикалық байқауға жолдама алған жерлесіміз Әлібек Айаруға сәттілік тілейміз!