Кітап – біздің досымыз: ертегілік калейдоскоп

Абай атындағы кітапханада 2 сәуір – Халықаралық балалар кітабы мерекесіне орай, «Абай облысы Семей қаласының арнаулы әлеуметтік қызметтер көрсету орталығы» үйден қызмет көрсету бөлімшесінің мүгедектігі бар балаларымен «Кітап – біздің досымыз» атты ертегілік калейдоскоп өткізді.
Аталмыш сағатта кітаптың шығу тарихы, Х. Андерсеннің өмірбаяны және оның керемет ертегілері туралы көптеген қызықты мағлұматтар берілді. «Андерсен ертегілерінің сиқырлы әлемі» атты иллюстриативті кітап көрмесіне шолу жасалып, орталық балаларының қатысуымен «Шалқан» атты орыс халық ертегісінен шағын көрініс көрсетілді. Көріністе арнайы киімдер мен мен бетперделерді киіп алған балалар өз рөлдерін тез меңгеріп алып, көңілді атмосфера тудырды. Сондай-ақ орталық тәрбиеленушілерінің ата-аналары «Бауырсақ» ертегісінен шағын сахналық көрініс жасап, балаларды қуанышқа бөледі.
Шара соңында тәрбиеленушілер Андерсеннің ертегілері, түрлі-түсті ашылмалы, музыкалы кітаптармен жасақталған «Кітаптардың сиқырлы әлемі» кітап көрмесімен танысып, «Авель» көркемсурет студиясының тәрбиеленушілерінің сурет көрмесін тамашалады.