«Абай жолы» кітапханасы – жауһар туындылар: кең көлемді кітап көрмесі

Қаламыздағы Шәкәрім атындағы университетте ұйымдастырылған «Республикалық кітап көрме – жәрмеңкесіне» Абай атындағы кітапхана да қатысып қайтты. Кітапхана қызметкерлері жақында ғана көпшілік оқырманға жол тартқан «Абай жолы» кітапханасы сериясымен жарық көрген кітаптар топтамасынан «Абай жолы» кітапханасы – жауһар туындылар» тақырыбында көрмені көпшілікке тарту етті.
Көрмеге ұлы ақын Абай Құнанбайұлының «Шығармалары», Шәкәрім Құдайбердіұлының «Шығармаларының» репринттік басылымы, Несіпбек Айтұлының «Есіл де есіл, есіл күн…», Бауыржан Жақыптың «Қарауылтөбе» және Т. Ысмайыловтың «Өмір гүлі», «Жыр жауһарлары», Т. Әбдірайымұлының «Ақ кептер» әңгімелері, А. Кемелбаеваның «Мұнара», Ә. Нұршайықовтың «Махаббат, қызық мол жылдар», Д. Рамазанның «Көш» романдары, Ы. Мұсаұлының Құнанбай қажы бейнеленген «Аға сұлтаны», М. Әуезовтің ақынға арналған «Абай Құнанбаев», Т. Жұртбайдың Абайдың қарасөздері туралы «Дәрілқарап» ғылыми зерттеулері, «Білгенге маржан» – абайтану жайлы мақалалар жинағы, «Абай кітапханасы сирек басылымдарда» жинағы, «Хранитель истории» атты 2-ші кітабы қойылды. Көрмедегі әр кітаппен оқырман қауым жақын танысып, өз ықыластарын білдірді.