Жүрек сөйлейді: әдеби кеш

26 сәуір күні Абай атындағы кітапханада жерлесіміз, белгілі ақын, журналист Ақылбек Манабаевтың туғанына 90 жыл толуына орай «Жүрек сөйлейді» тақырыбында әдеби кеш ұйымдастырылды. Аталмыш кешке ақынның ұлы Айдар Манабаев пен қарындасы Айгүл Ахмерқызы қатысты.
Кешке қаламгердің көз көрген замандастары, зиялы қауым өкілдері қатысып, жазушының өнегелі өмірі туралы ғалым М.Мұхамәдиұлы, Қ.Досымжанұлы естен кетпес естеліктерімен бөлісті. Шарада ақынның ұлы Айдар әкесі туралы қызықты жайттарды әңгімелеп, қарындасы Айгүл Ахмерқызы Ақылбек ағасының өлеңдерін жатқа оқыды.
Осындай әдемі кешке танымал композитор Т.Рахимовтың немересі Досхан Тұрсынғазы өзінің ән шашуын ала келіп, қатысушыларға көңілді күй сыйласа, А.Манабаевтың өмір жолы, шығармашылығынан сыр шертетін «Елінің мәуелі бәйтерегі» тақырыбында кең көлемді кітап көрмесі оқырмандарды қарсы алды. Көрмеге жазушының әр жылдарда шыққан еңбектері, мерзімді басылым беттерінде жарық көрген мақалалары және ол туралы жазбалар қойылды.
Іс-шара соңында Айдар Ақылбекұлы,Айгүл Ахмерқызы кітапхана ұжымына, ұйымдастырушыларға зор алғысын білдіріп, шығармашылық жеміс тіледі.
Елі барда ақын өлеңдері әлі де асқақтап, өз шыңына шығуына сенім білдіреміз!