Қайым Мұхамедханов – ұлтқа қызмет: еске алу кеші

14 мамыр күні Абай атындағы кітапханада жерлесіміз, тарихи тұлға, ғалым Қайым Мұхаметханұлының өмірден озғанына 20 жыл толуына орай «Қайым Мұхамедханов – ұлтқа қызмет» тақырыбында еске алу кеші өткізілді.
Кешке қаламгердің замандастары, зиялы қауым өкілдері, ұл-қыздары қатысып, жазушының өнегелі өмірінен естеліктер айтылды.
Аталмыш кеште алаштанушы, ғалымның шәкірті Құсмилия Жырғалыұлы ұстазы Қ.Мұхаметханұлына арнаған арнау өлеңін оқып,ұлтқа қалтқысыз аянбай еңбек еткен, Абайды өз биігінде қазаққа танытқан оқытушысы туралы естеліктерімен бөлісіп, А.Манабаевтың сөзіне жазылған Т.Базарбаевтың «Жан Аға» әнін орындады.
Жазушының қызы, профессор « Қайым Мұхамедханов атындағы білім және мәдениет орталығының» директоры Дина Мұхаметхан «Қайым Мұхамедханов – ұлтқа қызмет» тақырыбында ой қозғап, әкесінің жарқын бейнесін тыңдаушыларға жеткізсе, Шәкәрім атындағы университеттің оқытушысы Сәуле Қайсақызы «Қайым өлендерін 1930-1940 жж. латын графикасынан аудару тәжірибемде» атты дәрісін оқып, ғалым Қ.Мұхаметханұлының еңбегі жайында тың деректер жеткізді.
Ә. Бөкейхан атындағы университеттің кітапхана қызметкері Р.Мусабалинова Қайым туралы арнайы дайындаған бейнепоэзиясын көпшілікке ұсынса, кешке келуші қатысушыларды тарихи тұлғаның өмір жолы, шығармашылығынан сыр шертетін «Қайым Мұхамедханұлы – өзі музей, өзі архив, өзі тарих» тақырыбында кең көлемді кітап көрмесі қарсы алды. Көрмеге жазушының әр жылдарда жарыққа шыққан еңбектері, мерзімді басылым беттерінде жарық көрген мақалалары қойылды.
Шара соңында ғалымның қызы Дина Мұхаметхан кітапхана ұжымына, ұйымдастырушыларға зор алғысын білдіріп, қатысушылар Қайым ескерткіші басына барып, гүл шоқтарын қойды.