Алаш елі кеше, бүгін һәм ертең: еске алу кеші

29 мамыр күні Абай атындағы кітапханада 31мамыр Қуғын – сүргін құрбандарын еске алу аясында «Алаш елі кеше, бүгін һәм ертең» тақырыбында еске алу кеші өткізілді.
Еске алу кешіне арналған «Ұлы даланы оятқан Алаш Орда» тақырыбында көрме жасақталды. Көрмеде 52 томнан тұратын «Саяси қуғын – сүргін құрбандарын толық ақтау жөніндегі мемлекеттік комиссияның материалдары XX ғасырдың 20-50 жылдары» атты маңызы зор кітаптар, сонымен қатар Алаш зиялыларының жазған біршама кітаптары, латын қарпімен жазылған кітаптар жинақталып, оқырмандарға таныстыру жұмыстары жүргізілді.
Еске алу кешіне қаламыздағы жоғары оқу орындарының, колледж кітапханаларының кітапхана қызметкерлері, Абай облысы бойынша ҚАЖД №20 мекемесінің қызметкерлері қатысты.
Кештің шымылдығын Абай облысы мемлекеттік архиві, «Ғылыми анықтамалық аппарат және құжаттарды пайдалану бөлімінің» басшысы Лаура Қадырова «Саяси қуғын – сүргінге ұшыраған алаш қайраткерлерінің қызметтері» тақырыбында баяндамасымен ашса, Абайдың «Жидебай – Бөрілі» мемлекеттік тарихи – мәдени және әдеби – мемориалдық музей қорығының аға ғылыми қызметкері Қ.Қиықбай «Мәкен Тұрағұлқызының тағдыры» атты баяндамасымен жалғастырды.
Сонымен қатар Абай кітапханасының маманы Ж.Әділбекқызы кітапханадағы сирек қорда сақталған алаш зиялыларының еңбектерімен таныстырды.
«ALASH JASTARY» ұйымының басшысы Б. Сіләмжан «Жұмбақ әңгіме», Абай кітапханасының кітапханашысы А.Қадылбекұлы «Қазақ даласындағы ашаршылық һәм Алаш зиялылары» баяндамаларын таныстыра өтті.
Кеш соңын Абай кітапханасының маманы О. Долдашқызы «Абай электронды кітапханасы» атты баяндамасымен қорытындылады.