Академиялық кітапханалардың Еуразиялық конференциясы – 2024: конференция

Абай атындағы облыстық кітапхананың маманы 29-31 мамыр аралығында өтіп жатқан «Біріктіру, ынтымақтастық және құру: кітапханалық бірлестіктер мен серіктестіктерді дамыту мамандығымыздың болашағының кепілі» тақырыбындағы академиялық кітапханалардың Еуразиялық конференциясына қатысты. Аталмыш конференция Астана қаласындағы Назарбаев Университетінде өтуде. Конференцияға 18 елден өкілдер қатысуда.
Назарбаев Университетінің директоры Джеральд Кавана конференцияға қатысушыларға әртүрлі деңгейдегі және бөлімдердегі кітапханалардың жұмысын үйлестірудің маңыздылығы және олардың кітапханалық қызмет көрсету деңгейін арттырудағы бірлескен жұмысы туралы айта келе, көпшілік қауымды құттықтады.
Назарбаев Университетінің ғылыми жұмыстар жөніндегі вице-провосты Ч. Яблонский ақпараттық білімнің маңыздылығы және оны студенттер мен ғалымдарға жеткізу туралы айтса, IFLA басқарма мүшесі Лорда Гарсиа-Фебо Кітапхана қауымдастығы туралы сөз сөйлейді.
Сондай-ақ, конференция барысында Қазақстан Республикасындағы кітапханалар саны, жаңа автоматтандырылған АБИС жүйесін құру және енгізу, кітапхана қызметін жақсарту үшін жасанды интеллект құралдарын пайдалану туралы статистикалық мәліметтер айтылды.
Пленарлық отырыстарда IFLA шеңберіндегі кітапханалардың қызметі мен стратегияларына шолу жасалды. Сонымен қатар, бейнебайланыс арқылы БҰҰ өкілдері Шерри Алдис , Айхан Сарачоглу дүниежүзілік кітапханалардың БҰҰ-мен ынтымақтастығы, ақпараттық қатерлердің қаупі жайында тек кітапханалар ғана сенімді ақпарат беретіндігін мәлімдеді..
Бұл конференция тәжірибе мен практикалық шешімдер алмасу алаңы ғана емес, сонымен қатар әлемдегі барлық кітапханалар арасында ақпараттық байланыс орнатуға арналған. Аталмыш конференция 31 мамырға дейін өз жалғасын табуда.