Көк байрағым айбыным: жас ақындар мүшайрасы

Семей қаласы ішкі саясат бөлімі мемлекеттік мекемесінің тапсырысы аясында Қазақстан Республикасының рәміздер күніне орай Абай кітапханасы, «Абай жастары» жастар ресурстық орталығымен бірлесіп 3 маусым күні «Көк байрағым айбыным» тақырыбында жас ақындар мүшайрасын ұйымдастырды.
Шара барысында «Абай жастары» жастар ресурстық орталығының бөлім басшысы Өрлеубек Ерсінбек байқаудың шымылдығын ашып, қатысушыларға сәттілік тіледі. Екі кезеңнен тұратын мүшайраға 18-25 жас аралығындағы жас ақындар қатысты. Қатысушылар I кезеңде рәміздер күніне арнап жазған патриоттық өлеңдерін, ал II кезеңде еркін тақырыпта шығарған өлеңдерін нақышына келтіре оқыды.
Жыр мүшайрасына Шәкәрім атындағы университеттің қазақ филологиясы және журналистика кафедрасының профессоры А.Тоқсамбаева, ақын, Абай атындағы облыстық кітапхананың директоры М.Қарт, ақын, кітапхана қызметкері Б. Игілік және айтыскер ақын Абай облыстық тілдер орталығының директоры Қ.Кенжебекұлы әділ бағаларын берді.
Шара соңында әділқазылардың шешімімен Абай облысы «Семей қаласы ішкі саясат бөлімі» ММ-нің дипломымен, 80000 (сексен) мың теңгенің сертификатымен 1- орынды Б. Кәріпбаева, диплом және 60000 (алпыс) мың теңгенің сертификатпен 2- орынды М.Зекенов, диплом және 40000 (қырық) мың теңгенің сертификатымен 3 – орынды А.Серікұлы иеленді.
Сонымен қатар, арнайы 3 жүлденің дипломы мен 10000 (он) мың теңгенің сертификатын Нұрбол Ұлан, Серікқызы Ақгүл, Тұрарбек Мерей сынды жас ақындар иеленді. Барша қатысушылар алғыс хаттармен марапатталды.