Ғасырлармен үндескен асыл қазына: сирек кітаптар көрмесі

10 тамызда Абай кітапханасында кемеңгер тұлға Абай Құнанбайұлының туғанына 179 жыл толуына арналған аса сирек кездесетін басылымдардың «алтын» қорынан «Ғасырлармен үндескен асыл қазына»- атты көрме ұйымдастырылды. Қазақтың бас ақыны Абай Семейдің қоғамдық кітапханасын алғаш ұйымдастырушылар қатарында болып, іргелі мәдениет ошағына айналуына өз үлесін қосқан.
Алғашқы кезеңнен тұрақты оқырмандар санатында болған кемеңгер ақын өмірінің соңына дейін кітапханамен байланысын үзбеген. Арнайы сирек дереккөз-түпнұсқа әдебиеттерден ұйымдастырылған көрмеден Абайдың көзі тірісінде ол туралы жазылған басылымдар көрініс тапты. Кітапхананың қазына қоры Абай үшін таным баспалдақтары, ғылым-білім университеті болды.

Ақын өзі мүшесі болып, жұмысына араласқан Семей облыстық Статистика Комитетінің, Бастауыш білім беру қоғамының, Императорлық Орыс Географиялық Қоғамының Семей Бөлімшесінің «Есептері…», «Запискилері…», «Памятная книжкалары…» сияқты ғылыми басылымдары мен қатар дала ойшылының танымын кеңейткен ғылым салаларынан әдебиеттер көрме қонақтарына ұсынылды. Ақын туралы сол XIX ғасырдың соңы мен XX ғасыр басында баспа көрген құнды құжаттар оқырман қызығушылығы мен таңданысын туғызар жәдігерлер болды. Абай, Шәкәрім, Мұхтар мен алаш арыстарына рухани білім берген көне де құнды дереккөздер, орыс классиктері шығармалары, әлем сөз зергерлерінің үздік туындылары көрме қонақтары үшін тамаша тосын сый болды.