Жас өлкетанушылар сыр шертеді:өлкетану қонақжайы

15 қыркүйек күні Абай атындағы кітапхана пайдаланушылары мен қала тұрғындарына «Ертіс өңірі» өлкетану қоғамы, Абай атындағы кітапхана және Абай облысының «Дарын» орталығы дайындаған «Жас өлкетанушылар сыр шертеді» атты өлкетану қонақжайы өткізілді.
«Дарын» орталығының жетекші маманы, өлкетанушы В.А. Боровинский жұмыс нәтижелерімен және Абай облысындағы өлкетану ұжымдарын ұйымдастырудың жаңа жобаларымен бөлісті.Оның қамқорлығындағы өлкетану отрядның мүшелері және экономикалық лицейдің оқушылары Дарья Шарипова мен Ильвира Дүйсенова іс-шараны жүргізіп, тыңдаушыларды облысымыздағы туристік маршруттар мен экскурсияларды құру жұмыстарымен таныстырды. Қатысушылар «Мәңгілік Ел» және «Арбат» көшелері бойынша интерактивті экскурсияны тыңдады, оның барысында олар бүгінде қаланың сәулет ескерткіштері болып табылатын көшедегі үйлердің тарихымен танысып, жақында қалаға ұсынылған «Тарихи жол айрық» туралы өлкетану деректерін тыңдады. «Ертіс өңірі» қоғамының жас өлкетанушылары Қуанышбаев Мадияр мен Ахметов Әділ өз зерттеулерімен таныстырды. Мадияр ағайынды Мусиндердің бу диірмені туралы айтса, биологияға қызығатын Әділ қала маңынан табылған ерекше жануарлар туралы әңгімемен семейліктерді баурап алды.
Шараға қатысушылар үшін туризмнің дамуы мен өлкеміздің тарихынан сыр шертетін кітап көрмесі дайындалды. Көрмеге О.Мазбаевтың «Туризм және өлкетану негіздері», А.Омаровтың «Бесқарағай – Бөденелі шежіресі», А.Исиннің «Шыңғыстау, Берел, Шілікті, Абыралы», С.Ш.Ахметованың «Историческое краеведение в Казахстане», Н.П.Ивлевтің «Находки краеведа», «Казахстан туристский», Н.Г.Аполлованың «Хозяйственное освоение Прииртышья в конце 16 первой половине 19 в.» және өлкетанушы В.Н.Кашляктың кітаптар топтамасы қойылды.