«Туған өлкем – тұнған тарих»: өлкетану оқулары

2024 жылдың 19 қыркүйек күні Абай облыстық әмбебап кітапханасының қызметкерлері «Семей жоғарғы көпсалалы колледжінде» барып, скрипкашы Айткеш Толғанбаевтың туғанына 100 жыл,  Алаш қайраткері Ахметжан Қозыбағаровтың туғанына 145 жыл толуына орай «Туған өлкем – тұнған тарих» атты өлкетану оқуларын өткізді. Қатысушылардың назарына ұлы тұлғаларымызды толығымен таныстыру үшін  слайд шоу мен деректі фильмдер көрсетілді.

Кітапхана қызметкерлері шара барысында студенттерді Алаш партиясының белсенді мүшесі, әрі Ахмет Байтұрсыновтың жақын серігі, қазақ ұлтынан шыққан демократиялық зиялылардың бірі, әрі алғашқы білімді дәрігер Ахметжан Қозыбағаров пен қазақтан шыққан тұңғыш кәсіби скрипкашы Айткеш Толғанбаевтың өмірбаянымен, қызмет жолымен таныстырды.

Шара барысында Айткеш Толғанбаевтың басынан кешкен қатал тағдырын көз алдыңа алып келетін «Қатал тағдыр тәлкегі» кітабы да талқыланды. Кітапта айтылған Айткеш Толғанбаевтың екінші дүниежүзілік соғыс барысында көрген қиыншылықтары мен басынан кешкен небір оқиғалары, тұтқында болғанда тартқан азабы студенттерді селт еткізбей қоймады.

Кітапханашылар  Ахметжан Қозыбағаров пен Айткеш Толғанбаевтың ел үшін атқарған  қызметтерін Семей қаласымен байланыстыра отырып, құнды деректерге тоқталды. Іс – шараға колледж студенттері қатысты. Өлкетану оқулары барысында студенттерге өлкемізден шыққан даңқты азаматтарымыз жайлы қызықты факттер айтылды.

Өлкеміздің тарихы Семей өңіріне үлес қосқан таңдаулы тұлғалар есімімен тығыз байланысты. Өлкетану өз өлкесіне қызығушылық танытатын әр адамның ажырамас серіктесі. Сондықтан да өлкемізден шыққан ұлы тұлғаларымызды үмытпай, әрқашан дәріптеп отыруымыз қажет!