«Kitap Time – 2024» ІIІ жалпы республикалық кітап фестивалі

Бүгін Абай атындағы облыстық әмбебап кітапханасы шаңырағында «Kitap Time – 2024» ІIІ жалпы республикалық кітап фестивалі болып өтті.
Айтулы шараның мақсаты – кітап пен оқуға деген қызығушылықты қолдау, қоғамның интеллектуалды әлеуеті мен мәдени құндылықтарын насихаттай отырып, қала тұрғындарын кітап оқуға тарту, көркем әдебиетке деген құштарлығын, өскелең ұрпақтың рухани-адамгершілік білімін арттыру.
Іс-шараға зиялы қауым өкілдері, ақын-жазушылар, мәдениет қайраткерлері, кітапхана оқырмандары, қаламыздағы ЖОО студенттері мен қала колледждерінің, қала мектептерінің оқушылары қатысты.
Шара барысында кітапхана директоры М. Қарт құттықтау сөз сөйлеп, қазіргі жастардың кітап оқуға деген қызығушылығы уақыт өткен сайын артып келе жатқанын атап өтті.
Фестиваль аясында келушілерге «Абай жолы» кітапханасы – жауһар туындылар» , «Семей ақын-жазушылары» атты кітап көрмесі , «Балаларға базарлық» ретінде «Менің сүйікті кітабым», «Мен туған өлкеде» атты кітап көрмелері мен «Авель» студиясы мүшелерінің қатысуымен «Күз көрінісі» тақырыбында сурет көрмесі таныстырылып, жергілікті кітап дүкендерінің«Кітап – асыл қазына» атты кітап сатылымы осы шарадан көрініс тапты.Сонымен қатар, танымал ақындармен жарқын жүздесу бағдарламасы, «Талантыңмен танысам» атты қолөнер шеберлерімен кездесу аясында шеберлерден , «Сиқырлы қылқалам» үйірмесінің бастамасымен «Туған қалам – Семейім» тақырыбында әртүрлі шеберлік сағаттары ұйымдастырылды.
Қызықты думанға ұласқан мерекеде № 45 мектептің оқушысы А.Мұратханов «Қазақ тілі» атты әнін әуелете шырқап, тыңдармандардың жүрегінде бұғып жатқан патриоттық сезімдерін оята білсе, келесі кезекте осы мектептің оқушылары ақын Абай Құнанбайұлының өлеңдерін нақышына келтіре отырып мәнерлеп оқып, көрермен жүрегіне жеткізе білді. Әрі қарай әуезді ән мен жырға ұласқан кітапхана алаңына жиналған қалың жұртшылық күнделікті тұрмыстан бір сәтке бой жазып, жақсы көңіл-күймен айтулы мерекені тамашалады.
«Ауылға 100 кітап» жобасы аясында Абай, Қайнар сынды аудан орталықтарына кітап сыйлау акциясын да назардан тыс қалдырылмады. Аталмыш ауданнан келген әріптестеріміз мерекелік іс-шараға қатыса отырып, өздерінің туған жерлерінен шыққан танымал тұлғалар туралы сыр шертетін кітап көрмесін жасақтап, шолу жасады.
Барша жиналған қауымға шығармашылық табыстар тілейміз!