Семейден ескен самал. Семей ақындар антологиясы: тұсаукесер рәсімі

Қыркүйек айының 21 күні Абай атындағы кітапханада қала күнін мерекелеу аясында, Семей қаласы әкімінің қолдауымен, ақын М.Қарттың құрастыруымен «Семейден ескен самал» Семей ақындар антологиясы жыр жинағының тұсаукесері өтті. Туған өңірінен шыққан ақындардың өлеңдерін бір арнаға тоғыстырып  жинақтау идеясы ақын М.Қарттікі.

Іс-шараға Семей қаласының әкімі Н.Нұрсағатов, ақын профессор Б.Жақып, ҚР еңбек сіңірген қайраткері, Дарын мемлекеттік жастар сыйлығының, халықаралық “Алаш” әдеби сыйлығының иегері Д.Кәпұлы, зиялы қауым өкілдері, әдеби орта өкілдері және кітап сүйер қауым қатысты.

Қала әкімі Н.Нұрсағатов жиналған қауымды келе жатқан қала күнімен құттықтай отырып, жап-жаңа жинақтың  құндылығына тоқталса, ақын профессор Б.Жақып, өз кезегінде қазақ халқының ұлттық руханияты нығайып келе жатқанын алға тартып, Семей ақындар антологиясына жоғары баға берді.

Жиналған қауыммен қоса қала әкімі Н.Нұрсағатов, профессор Б.Жақып, ҚР еңбек сіңірген қайраткері, Дарын мемлекеттік жастар сыйлығының, халықаралық “Алаш” әдеби сыйлығының иегері Д.Кәпұлы «Семейден ескен самал» Семей ақындар антологиясы кітабының тұсаукесер рәсімін жасады.

Бұл жинаққа Абай облысы өңірінен шыққан, осы өңірдің төл перзенттері қазақ поэзиясы өкілдерінің таңдаулы өлеңдері, һәм танымал  ақындары С. Дүйсенғазы, Т.Ешен, Д.Берікқажы, Д.Кәпұлы, А.Елгезек, Қ.Сарин, С.Қамшыгер, М.Қарт, Б.Игілік, О.Қасым, А.Шеризат, Е.Жұмабекұлы, Б.Ахмер, Н.Байтөс т.б. ақындардың таң шығындай мөлдіріген, өткір тілімен ерекшеленетін лирикалары енген. Іргелі антологиялық жинаққа қызығушылық танытушы оқырман шоғыры да қалың болды. Аталмыш кітап өз оқымандарымен қауышуда.