Қазақстан – бейбітшілік елі: ақпараттық сағат

Қазан айының 22-жұлдызында Абай атындағы облыстық әмбебап кітапханасында Республика күніне орай, «Қазақстан – бейбітшілік елі» тақырыбында ағылшын тілінде ақпараттық сағат өткізді. Айтулы шараға қаламыздағы Медицина университетінің шетелдік студенттері қатысты.
Қонақтарға арнап қазақ халқы туралы және Республика күні мерекесін тойлаудың маңыздылығы жөнінде алуан түрлі бейнематериалдар ұсынылды.
Сондай-ақ, іс-шараға қатысушылар үшін Қазақстанның тарихы мен мәдениетін білуге арналған «Қазақстан туралы не білесің?» ассоциациялық байқауы, ұлттық тағамдар сайысы, Қазақстан тарихы мен мәдениеті бойынша сұрақтар дайындалған «Бәйге» сайысы және «Мақал-мәтелді жалғастыр» сайысы сынды әртүрлі ойындар әзірленді.
Аталған сайыстарға барлық студенттер белсене қатысып, ерекше қызығушылық танытты. Басқалардан оқ бойы оза шауып, өзінің үздік екендігін дәлелдей алған студенттер: Али Амир, Бафанда Базила Парвайз.
Шара соңында қонақтарға Республика күніне арналған Жандарбек Мәлібекұлының «Мен – Қазақстан азаматымын», «Қазақстан елтаңбасы», Сайын Назарбекұлының «Қазақтың киіз үйі» және де «Kazakhstan», «Kazakh traditions and ways» сынды үш тілдегі кітаптар көрмесі ұсынылды.