Қаныш және ғылыми майдан: кітап таныстырылымы

10 желтоқсан күні Абай кітапханасында  «Отбасы хрестоматиясы» қоғамдық қоры, Абай кітапханасы және «Асық» әдеби-мәдени клубының ұйымдастыруымен «Отбасы хрестоматиясы» жобасы аясында «Отбасы» Баспа үйінен жарыққа шыққан «Қаныш және ғылыми майдан» кітабының таныстырылымы болып өтті.

Кітап қыркүйек айында жарыққа шығып, таныстырылымы републикамыздың әр жер-жерлерінде, атап айтқанда Сәтбаев, Астана, Алматы, Тараз, Шымкент, Түркістан, Арыс, Орал, Атырау, Ақтөбе, Ақтау, Көкшетау, Талдықорған және т.б. қалаларында  жоғары деңгейде өтті. Ал,  бүгін  Семей жұртшылығына таныстырылуда.

Аталмыш кітап таныстырылымына осы кітаптың авторы Санжар Керімбай арнайы келді. Іс-шарада С.Керімбай қазақтан шыққан тұңғыш академик, геолог-ғалым қаныш Сәтбаевтың болмысы мен өмір жолы, ғылым жолындағы жанқиярлық еңбектері жан-жақты талқылай отырып, кітаптың 90 пайызын жерлесіміз Медеу Сәрсеке жазып кеткендігін жеткізді. Сондай-ақ бұл туындымен бірге «Бала Қаныш оқыған кітаптар» сериясымен алты кітаптан тұратын топтама, Төкен Оразовтың «Қаныштың жастық шағы», Ебіней Бөкетовтің «Жас Қаныш», Медеу Сәрсекенің «Қуғындалған Сәтбаев» кітаптары қайта басылып отыр.

Шараға келуші қонақтарды Абай кітапханасы жасақтаған «Қаныш Сәтбаев және отандық ғылым» атты мерзімді басылым беттері мен кітаптардан тұратын кең көлемді кітап көрмесі мен Семей қаласының облыстық тарихи өлкетану мұражайының «Семей және Сәтбаев» тақырыбындағы көрмесі қарсы алды.

Абай кітапханасының арнайы жасақтаған кең көлемді кітап көрмесі бірнеше бөлімнен құралды. Келушілер қазақтың Қанышы жайында ерекше ақпараттармен таныса отырып, «Қаныш Сатпаев» энциклопедиясына, М.Сәрсекенің «Дара дарын», «Сатпаев», «Сәтбаев ұлағаты», «Қазақтың Қанышы феномен», «Феномен»,  «Планета Сатпаева», А.Брагиннің «Первый академик» және т.б. кітаптарға ерекше ықылас білдірді.