Алаш тағылымы – Тәуелсіздік негізі: кең көлемді кітап көрмесі

11 желтоқсан 2024 жылы еліміздің Тәуелсіздік күніне және Алашорда үкіметінің құрылған күніне орай Абай атындағы облыстық әмбебап кітапханаға келген пайдаланушыларды «Алаш тағылымы – Тәуелсіздік негізі» – кең көлемді кітап көрмесімен қарсы алды. Көрменің ерекшелігі кітапханамыздың бай қорындағы мерзімді басылымдарда жария көрген алаш тарихына қатысты мол мақалалар мен Мемлекет басшысы Қасым-Жомарт Тоқаев «Саяси қуғын-сүргін құрбандарын толық ақтау жөніндегі мемлекеттік комиссия туралы» қол қойған Жарлығына сәйкес Қазақстан Республикасы бойынша шыққан 52 том кітаптар топтамасынан, сондай-ақ алаш зиялыларының көзі тірісінде жария көрген сирек кітаптардан және Ә.Бөкейхановтың, А.Байтұрсыновтың, С.Торайғыровтың көркем сөздерімен, С.Торайғыров жазған «Алаш ұранымен» өрнектелді.
Көрме-экспозициядан көрініс тапқан «Императорлық Орыс Гелографиялық Қоғамының Батыс-Сібір Бөлімінің Семей Бөлімшесінің Запискилеріндегі» Ә.Бөкейханның, Ж.Ақбаевтың ғылыми мақалалары, Ә.Ермековтың «Ұлы математика курсы», Т.Шонанұлының «Орыстарға қазақ тілін үйреткіш» оқулығы, Х.Дорсмұхамедовтың «Как бороться с чумой среди киргизского населения», А.Мамытұлының «Денсаулық жолында», Ж.Тілеулиннің «Жұқпалы науқастар» сынды көзі тірісінде жария көрген түпнұсқа еңбектерімен танысу шара қонақтары үшін керемет жаңалық болды. 52 томдық жинақтың Абай облысына (бұрынғы Семей) қатысты қос томы тыңдарман назарын өзіне тартты. Елімізде қуғын-сүргін оты шарпымаған шаңырақ қалмағанын ескерсек әр тыңдарман өз туысы, жақыны туралы дерек бар ма деген үміт оты жанды. Шараға келген Төтенше жағдайлар Департаменті мен Қылмыстық атқару жүйесі Департаментінің №20 мекемесі қызметкерлері ақпарат тыңдап қана емес, фильм көргендей әсер алдық деп ризалығын білдірді.