Кітапхана және аймақтық мәдени кеңістігі: кеңейтілген рухани-мәдени шара

17-18 желтоқсан күні Абай кітапханасында «Кітапхана және аймақтық мәдени кеңістігі» тақырыбында кеңейтілген рухани-мәдени шара өткізілді.
Шараға Абай облысының кітапханашылары қатысты.
Іс-шара барысында Облыстық мәдениет басқармасы басшысының орынбасары Толқын Берікбекқызы сөз сөйлеп, сәттілік тілесе, Абай кітапханасы директоры Мерей Қарт кітапхана тынысына тоқталды.
Шараға арнайы шақырылған қонақтар «018.kz» ақпараттық порталының бас редакторы, блогер, ЖИ бойынша эксперт Д. Кенжеғазыұлы «Жасанды интеллект – кітапханадағы цифрлық мәдениеттің жаңа мүмкіндігі» тақырыбында, «Abai IT Valley» технологиялық кластерінің директоры, IT саласы бойынша кәсіби маман Б.Наурызбаев «Цифрлық трансформация: кітапхана және IT технологиялар» атты шеберлік дәрістерін өткізді.
Абай кітапханасы директорының орынбасары Г.М.Аязбаева «Кітапханалар саласындағы жаңалықтар мен мәселелер» тақырыбында баяндама жасады. Баяндамада заманауи кітапханалар тынысы, Қазақстандық Кітапханалық Одақ, IFLA және сондай-ақ мемлекеттік тапсырыспен шығатын кітаптарды заманауи жолмен тарату ісі туралы қамтыса, «Кітапхана көрсеткіштері есебінің жаңартылған талаптары» тақырыбында Абай кітапханасының әдіскері А.Қ. Оспанова сөз қозғап, Абай облысы бойынша кітапханалардың жылдық есеп тапсыру мәселелері, кітапхана қызметі модулі, талап бойынша толтыру қажет графалар мен кестелерді дұрыс толтыру жолдарына тоқталып, кітапханалардың ішкі тынысына жете мән беру керектігін баса айтты.
Абай атындағы облыстық әмбебап кітапханасының кітапханашысы И.Қ.Нуржанова «Кітапхана жұмысын арттыру: жасанды интеллект құралдары» тақырыбында баяндама жасап, өз ойын ортаға салып, практикум өткізді. Практикумда заманауи кітапханалардың жетістіктерін үлгі ете отырып, қазіргі дамушы кітапханаларға жасанды интеллект құралдарының ауадай қажет екендігін айтып, келешекте жасанды интеллектіні кітапхана ісіне қосу үшін қандай бағдарламаларды оқып үйрену керек және оны қолданысқа асыру мәселелері туралы көрсетті.
Рухани-мәдени шараның жалғасын Абай кітапханасының мамандары О.Д.Кайсина, Ж.М.Чушековалар «Электронды кітапханалар қызметін пайдалану әдістері» тақырыбында практикум сабақпен жалғастырды. Семинар-практикум Абай атындағы кітапханасы жасақтаған Алаш электронды кітапханасын https://alash.semeylib.kz/ кітапхана қызметінде пайдалану мүмкіншіліктерін көрсетуге негізделді.
Практикумға қатысушы кітапхана қызметкерлеріне Алаш қайраткерлерінің есімдері беріліп, мамандар электронды кітапхананы пайдалану арқылы өз іс-шараларын қалай өткізуге болатынын көрсетіп, өз шараларының жоспарын жасап, бағдарламасын қорғады.
Практикум соңында әр ауданнан келген әріптестерге электронды кітапхананың тағы қандай мүмкіншіліктерін қолдануға болатыны жайында айтылып, кеңестер берілді.
Кітапхана мобилографы Н.Н.Қализада «Мобилография – кітапханадағы цифрлық мәдениеттің жаңа мүмкіндігі» тақырыбында тренинг сағатын өткізді. Тренингте мобилография саласының кітапхана ісіне ғана емес, кел-келген мамандыққа қосымша ақпарат пен жарнама бола алатындығын айта отырып, бейнесюжеттерді қалай жасау керек, түсірілген бейнесюжеттің сапасына мән беру керектігін жеткізді. Сондай-ақ, осы айтылғандардың барлығын іс-тәжірибе ретінде ұялы байланыс арқылы көрсетіп, бейнесюжеттерді байланыстыру мен мән-мағынасына қарай әуендік сүйемелді таңдауларды көрсетті.
Екі күнге созылған шара соңы «Артық білім кітапта …» тақырыбындағы әдеби квизбен өз жалғасын тапты.