Ұрпаққа аманат – тәуелсіз елдің туын биік ұстау: еске алу кеші

14 қаңтар күні Абай кітапханасында тарихшы, жазушы, филология ғылымдарының докторы, Қазақстанның халық жазушысы Мұхтар Мағауиннің өмірден озуына байланысты «Ұрпаққа аманат – тәуелсіз елдің туын биік ұстау» атты еске алу кеші өткізілді. Еске алу кешін «Қазақстан Халық партиясы» Абай облысындағы филиалы мен Абай атындағы облыстық кітапханасы ұйымдастырды.
Шараны Абай атындағы облыстық әмбебап кітапханасының кітапхана директоры М.Қарт ашып, жазушының сан қырлылығына тоқталып, ұлттың рухани шежіресін түгендеп, жаңғырта білген қайраткер екендігін жеткізіп, жиналған қауымға 1 минут үнсіздік жариялады.
Шарада тарих ғылымдарының кандидаты, профессор М.Кәрімов, «Ақ жол» партиясының ардагері, «Құрмет» орденінің иегері Рахат Алтай, «Қазақстан Халық партиясы» Абай облысы филиалының төрағасы А.Егеубаев, филология мамандығы бойынша философия ғылымдарының PhD докторы, ақын Қ.Әубәкірова барша қазақ жұртына қаймыға тұрып көңіл айтып, жазушының тек әдебиетшілер үшін ғана емес, мәдениеттанушы, ғалымдар мен тарихшылар үшін де мол мағлұмат, терең тақырып, шүйгін ой ұсынған, дәлелін дәлдеп, өзіндік тұжырыммен кестелеген олжасы мол ойшыл екендігіне тоқталса, танымал композитор А.Бейсенбеков жазушымен жүздескен жылдарын еске алып, ой толғады.
Сондай-ақ, кешке жазушының туған балдызы Ерғали Нұрғалиұлы арнайы келіп, жездесі М.Мағауинді еске алып, жарқын күндерден қалған жылы белгілермен бөлісті.
Қазақтың рухани тарихындағы реңкті қалыптастырған ірі суреткер -М.Мағауин, ұлт жүрегінде мәңгі сақталмақ.