Т. Жанғалиев «Қарқуар»: кітап таныстырылымы

Абай атындағы кітапханада ақын, Қазақстан жазушылар және журналистер Одағының мүшесі, Ы. Алтынсарин атындағы төс белгінің иегері, ҚР мәдениет қайраткері, «Халықаралық Жамбыл қоры» сыйлығының және «Халықаралық Алаш» әдеби сыйлығының иегері Т. Жанғалиевтің «Абай жолы» кітаптары сериясымен шыққан «Қарқуар» кітабының таныстырылымы өтті.
Кеш барысында ақын, Абай атындағы кітапхана директоры М. Қарт құттықтап, сый-сияпат көрсетті.
Шарада дәстүрлі әнші Айдан Бауыржанұлы Абайдың әні «Көзімнің қарасы» ән шашуымен ашты. Ақын ҚР Мемлекеттік сыйлығының лауреаты Т. Әбдікәкімов, ақын, өнертанушы Қ. Нұрқасым құттықтау сөз сөйлеп, ақынға арнаған өзекжарды тілектерін арнады.
Кеш қонақтары Абай ауданы ішкі саясат бөлімінің басшысы Б.Байболов, Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығының директоры Ұ. Сағадиев, ақынды құттықтап сөз сөйлеп, Б. Байболов Т. Жанғалиевтің «Қайран Төке» өлеңін, ақын Қ. Еркінұлы өзінің «Әкей сөзі» өлеңдерін оқыды. Семей қаласының облыстық тарихи-өлкетану мұражайының директоры Қ. Сабырбай сөз алып, ақынның 75 жасқа толуымен құттықтап, сый-сияпатын көрсетті. Шара барысында Ә. Қашаубаев атындағы филармония әншісі Б.Түктібаев М. Ержановтың «Сайра бұлбұл» әнін шырқап, кітапхананың оқырманы Н. Мұхамеджанова Т. Жанғалиевтің «Абайым дәл осындай» әнін орындады.
Шәкәрім атындағы мемлекеттік университетінің студенті А. Серікқали ақынның «Қарқуар» өлеңін оқып, Е. Аталықов «Адай» күйін шертті. Ақын
Т. Жанғалиев кешке жиналған оқырман қауымға алғысын айтып, өз шығармашылығынан жыр жолдарын оқыды.
Шараға арнайы «Даналықпен дараланған ақын әлемі» атты тақырыпта кітапхана қорында бар ақын шығармалары мен мерзімді басылымдарда жарық көрген мақалалардан кітап көрмесі ұйымдастырылды.