Мамандығым туралы айтамын: кездесу кеші

7 ақпан күні Абай кітапханасы шаңырағында «Жұмысшы мамандықтар жылы» аясында «Былғары және үлбір өндірістік бірлестігінің», яғни барлық ғұмырын осы кәсіпорынның дамуы мен гүлденуіне арнаған еңбек ардагерлерімен кездесу кеші өтті. Бұл тұлғалардың есімі аталмыш зауыттың тарихымен тығыз байланысты десек артық айтпаймыз. Кездесу кешіне: П.Ақпанова, З.Авдеёнок, Г. Дильмухамедова, К. Махмудов, Н.Никитченко, Г.Литвинцева, Г.Янгузарова, Р.Исбасханова сынды майталман ардагерлер келді. Шараға Облыстық және қалалық Ардагерлер Кеңесінің мүшелері мен «Қазтұтынуодағы агробизнес және экономика колледжі» және «Бизнес және сервис колледжі» студенттері қатысты.
Былғары зауыты Ардагерлер кеңесінің Төрағасы, осы кәсіпорында қауіпсіздік техникасы бойынша 40 жыл инженер қызметін атқарған, Семей қаласының Құрметті ардагері Ақпанова Парита Әмірғалиқызы зауыттың 100 жылдығымен таныстырып, аталмыш кәсіпорынның көпес Плещеевтің шағын жертөледе қолөнер өнідісін ұйымдастыруынан бастау алатындығына тоқталды.
П.Ә.Ақпанова сөзінің дәлелі ретінде қатысушылар назарына фотомұрағаттардан тұратын «Былғары және үлбір өндірістік бірлестігіне – 100 жыл» тақырыбындағы слайд көрсетілімін ұсынып, Мұқашев, Ишмұхамедов, Әбдірамов, Жерносенко және тағы да басқа жанұялардың осы мамандықты әулеттік ұстаным ретінде әлі де жалғасырып келе жатқандарына тоқталды.
Сондай-ақ, кездесу кешінде кеш қонақтары тері илеу, әрлеу, кесу, аң терісін өңдеу сияқты цех жұмыстары туралы әңгіме өрбітті, өткенді еске алды, қызықты сәттермен бөлісті.
Қаламыздағы «Татар өнер мектебінің» оқытушысы Ғабдулхак Ғабдулұлы Ахунжановтың жетекшілігімен Миндияр Ахунжанов, Таир Бекбаев сынды жас өнерпаздар кеш қатысушыларына орыс, қазақ, татар тілдерінде ән шырқап, көпшілік көңілін көтерсе, кітапхана тарапынан
«Семей былғары – үлбір зауыты: тарих шежіресі» тақырыбында көрме дайындалып, әр жылдардағы мерзімді басылым беттерінде зауыт тарихына арналған, зауыт жайында жарияланған мақалалар қойылып, былғары зауытының ардагерлері дайындаған «Кожевенно-меховому объединению 100 лет» альбомы көрермендер назарына ұсынылды.
Шара соңында ардагерлер кездесуге келген студент жастарға тілектерін жеткізсе, студенттер ардагерлерге мықты денсаулық тілеп, шараны ұйымдастырушы кітапхана ұжымына өз алғыстарын жеткізді.