Бесқарағай және Ертіс өңірінің археологиялық ескерткіштері: өлкетану қонақжайы

16 ақпан күні Абай кітапханасында«Ертіс өңірі» тарихи-өлкетану қоғамы, Абай кітапханасы және Павлодардан келген қонақ – археолог В.К.Мерцпен бірлесіп дайындаған «Бесқарағай және Ертіс өңірінің археологиялық ескерткіштері» тақырыбындағы өлкетану қонақжайы өтті. Шараға кітапхана пайдаланушылары мен қала тұрғындары қатысты.
Виктор Карлович Мерц – кәсіби археолог, өлкетанушы, Павлодар облысындағы археологиялық қызметтің негізін салушы, С.Торайғыров атындағы ПМУ-нің біріккен археологиялық зерттеу орталығының директоры. Қазақстан, Ресей және Германияның бірқатар ғылыми басылымдарында жарияланған 80-ге жуық ғылыми еңбектердің авторы.
Павлодарлық ғалым семейліктерді қола дәуіріндегі Бесқарағай археологиялық ескерткіштері – өзі зерттеген Сарықамыс «Г», Тасқұдық-3, Тополка орындарымен таныстырып, Семияр қалашығында протоқалалық мәдениеттің қалыптасуына тоқталды. Археолог сонымен қатар Шығыс Қазақстан мен Павлодар Ертіс өңіріндегі ерте қола дәуірі ескерткіштерінің тарихына қатысты зерттеулерімен бөлісті.
Шара тұсаукесер және кітап көрмесімен ұласты. Кітап көрмесіне: С.С.Черниковтың «Восточный Казахстан в эпоху бронзы», О.Исмагуловтың «Население Казахстана от эпохи бронзы до современности», «Поздний кайнозой казахстанского Прииртышья», Н.Г.Апполованың «Хозяйственное освоение Прииртышья в конце XVI первой половине XIX века», «Археологические памятники в зоне затопления Шульбинской ГЭС», А. Исиннің «Шыңғыстау, Берел, Шілікті, Абыралы. 1999-2003жж. Археологиялық зерттеулер», Ғ.Қ.Омаровтың «Практикалық археология» қойылды.