Шәкәрім оқулары: облыстық байқау

3 наурызда Абай кітапханасында ақын Шәкәрім Құдайбердіұлының шығармашылығын балалар мен жасөспірімдер арасында кеңінен таныту мақсатында III республикалық «Шәкәрім оқулары» республикалық байқауының облыстық іріктеу кезеңі өтті. Байқау ҚР Ұлттық академиялық кітапханасының бастамасымен ұйымдастырылды.
Облыстық кезеңге Абай облысына қарасты кітапханалар мен мектептердің 5-8 сынып оқушыларынан іріктелген 10 оқушы қатысып, өз білімдері мен шеберліктерін сынады.
Қазылар алқасының құрамында «Дарын» мемлекеттік жастар сыйлығының иегері, кітапхана директоры Мерей Қарт Мейртайұлы, әдебиеттанушы-философ, Қазақстанның еңбек сіңірген қайраткері Шаңбай Тұрдықұл Қасенұлы, Қалалық мәдениет сарайының директордың орынбасары, айтыскер, ақын Айбек Жеңісқазин болды. Олар қатысушылардың орындау деңгейін бағалап, әділ шешім шығарды.
Байқау барысында қатысушылар Шәкәрім шығармаларын жатқа мәнерлеп оқу шеберлігіне, өлеңді таңдау қабілетіне, орфоэпиялық нормаларды сақтауға, сахна мәдениеті мен ұлттық киім үлгісіне баса назар аударды.
Қазылар алқасының шешімі бойынша:
– I орын – Оңғартай Айару Саятқызы
– II орын – Дулатова Махфузе Дулатқызы
– III орын – Рысқалиева Айару Рысқалиқызы.
Жүлдегерлерге арнайы сыйлықтар табысталып, барлық қатысушыларға сертификаттар берілді.
Шәкәрім университетінің Филология жоғары мектебінің 3 курс студенті Жұматаева Ғазизаның орындауында «Қыз дәурен-ән дәурен» әнін орындады.
Астана қаласына жолдама алған Оңғартай Айару Саятқызына сәттілік тілейміз!