Жеңіс – ұрпаққа мұра: кең көлемді экспозициялық кітап көрмесі

Жеңістің 80 жылдығына орай 5 наурыз күні Абай кітапханасында Семей электротехника колледжінің студенттері мен Семей медицина университетінің студенттеріне «Жеңіс – ұрпаққа аманат» атты көрмесіне шолу өткізілді.
Кітапхана маманы жастарды көрменің бөлімдерімен таныстырып, Екінші дүниежүзілік соғыстың жалпы кезеңдері, қазақстандықтардың соғысқа қатысуы, олардың арасындағы Қазақстанның белгілі жазушылары Бауыржан Момышұлы, Қасым Қайсенов, Әди Шәріпов, Әзілхан Нұршайықовтар туралы әңгімеледі. Олар өз естеліктерінде кеңес халқының ерліктерінің жарқын және қайғылы суреттерін қалдырды. Маман екінші дүниежүзілік соғыс туралы заманауи зерттеулерге назар аударды, өйткені бұл тақырып посткеңестік елдердің тарихында мұқият қарастыруды қажет етеді. Қазіргі заманауи қазақстандық зерттеушілерінің келесі кітаптарын ұсынамыз: Л.Ахметованың «Брестская крепость. Казахстан», «Кошкарбаев», М. Смагуловтың «Халықтың ары мен намысындай», М.Жакупованың «Тыловые эвакогоспитали Казахстана и республик Средней Азии», «Завтра возвращаюсь на фронт… (из истории эвакогоспиталей в Семипалатинске)», Ш.Қалиакпаровтың «Побеждали с патриотизмом в сердце» «Қазақ жауынгері Ұлы Отан соғысы майданында. Казахстанцы в Великой Отечественной войне».
Көрменің «Отты жылдар әуендері» бөлімі студенттерді сирек кездесетін күй табақтарымен, ал «Кітапхана Ұлы Отан соғысы жылдарында» бөлімінде эвакуациялық госпитальдарда жаралылар үшін жиі кездесулер өткізетін кітапханашылардың қызметі көрсетілді.
Оқырмандар соғыс кезеңіндегі газеттерге ерекше назар аударды, оның ішінде: «Известия», «Казахстанская правда», «Исторический журнал», «Народное хозяйство Казахстана», «Красный библиотекарь», сондай-ақ біздің жергілікті «Прииртышская правда» газеті. «Газеты – это секундные стрелки истории» деп А.Шопенгауэр айтқандай, бұл бірегей қасиет ел үшін қиын кезеңде қаламыздың қалай өмір сүргенін байқауға мүмкіндік береді.