Қолөнер – қазыналы сырлы өнер: этнокөрме

15 наурыз күні «Мәдениет және ұлттық салт-дәстүр» күніне орай Абай атындағы кітапханада «Қолөнер – қазыналы сырлы өнер» тақырыбында ұлтымыздың мәдени мұрасын насихаттау мақсатында көрме ұйымдастырылды. Қаламыздағы этно бұйымдарды тігуден қолөнер шебері Арайлым Мәулімғазықызының қолынан туындаған ұлттық қолданбалы өнер туындылары, тұрмыстық-сәндік бұйымдар көрме арқылы кітапхана пайдаланушыларына ұсынылды.
Шараға еліміздің түпкір-түпкірінен халықаралық өнерпаздар байқауына қатысуға жиналған қала қонақтары, өнерпаздар мен қаламыздағы бірнеше мектептердің ұстаздары, ата-аналар мен оқушылары қатысты. Жиналған қауым шебердің алтын қолынан шыққан қазақтың қазыналы сырлы өнерінен сыр шертетін туындыларын тамашалады және ұнатқан заттарын кәде-сый ретінде сатып ала алды.
Халқымыздың төл өнерін қастерлеуге бағытталған көрмеде қазақтың ою-өрнегімен өрнектелген құрақ көрпелер, жастықшалар, этно сөмкешелер, заманауи этно стильдегі «Шопер» сөмкелер, қыз балалар мен ұл балаларға әшекейлі тақиялар және камзолдар мен бешпеттер, тұмарлар, қоржындар, этно қалташалар, ойыншық қуыршақтар, әшекей бұйымдар: алқа, сырға, сақина, білезік шолпы, шашбау, шекелік т.б., көптеген бұйымдар ұсынылды.