Ғұмырын ғылым мен әдебиетке арнаған тұлға: еске алу кеші

18 наурыз күні Абай кітапханасында Қазақстан Жазушылар одағының мүшесі, «Парасат», «Құрмет» ордендерінің иегері, жазушы Медеу Сапаұлы Сәрсекенің өмірден озғанына 1 жыл болуына байланысты «Ғұмырын ғылым мен әдебиетке арнаған тұлға» атты еске алу кеші өткізілді. Еске алу кеші кітапхана қорындағы жазушының еңбектерінен жасақталған «Қазақтың ұлы перзенті» тақырыбындағы кітап көрмесімен ашылды. Аталмыш көрмеге шолу жасалып, сөз кезегін кітапхана директоры М.Қарт алып, жазушының ерендігі жайында тоқталып, өткен күндерге шолу жасаса, Республикалық «Абай Құнанбаев» қоғамдық қорының президенті Отантай Кәрібжанов Медеу Сәрсеке туралы өткен күннің естеліктерін қатысушылармен бөлісті.
Медеу аға қазақтың біртуар перзенті, ұлы ғалым Қаныш Сәтбаевтың өнегелі өмір жолын баршаға танытқан кемеңгер жазушы десек артық айтқанымыз емес. Жазушы қаламынан өрілген еңбектерін халқына жеткізуге демеушілік танытушы белгілі кәсіпкер, Абай облысы мәслихатының депутаты Марат Серікжанұлы Құрманбаев жиналушыларға М.Сәрсекенің аманатын орындағандығын жеткізіп, оған деген құрметін әңгімеледі.
Еске алу кешінің бір ерекшелігі М.Құрманбаевтың демеушілігімен жарыққа шыққан жазушының «Дара дарын», «Біртуар Бөкетов», «Ноқталанған тарихшы», «Сексен бестің төрінен» атты құнды еңбектері қаламыздағы колледж кітапханаларына және аудан кітапханаларына тегін таратылды. Шараға колледж кітапханашылары мен Абай облысының аудан кітапханашылары қатысты.