Ұлыстың ұлы күні – Әз Наурыз: экспозициялық кітап көрмесі

Наурыз мейрамы қарсаңында, 19 наурыз – Жаңару күніне орай Абай атындағы облыстық әмбебап кітапханасында «Ұлыстың ұлы күні – Әз Наурыз» атты кең көлемді экспозициялық кітап көрмесі ұйымдастырылды. Бұл көрме Жаңару күні, қазақ халқының ежелгі дәстүрін дәріптеп, ұлттық мәдениетіміздің терең тамырын таныту мақсатында ұйымдастырылды.
Көрмеге оқырмандар, студенттер мен оқушылар келіп, Наурыз мейрамының шығу тарихымен, қайта жаңғыру кезеңдерімен және оның түркі халықтары арасындағы тойлану ерекшеліктерімен танысты. Кітапхана қызметкерлері келген қонақтарға қазақ халқының салт-дәстүрлері мен әдет-ғұрыптары туралы мол мағлұмат беріп, Қазақстан аумағында тұратын түрлі этнос өкілдерінің ұлттық тағамдары мен олардың дайындалу ерекшеліктері жайлы қызықты деректер ұсынды.
Көрмеге халқымыздың тұрмыс-тіршілігі, мәдениеті мен ұлттық мұралары туралы жазылған кітаптар мен мерзімді басылымдар қойылды. Олардың ішінде: «Қазақ халқының салт-дәстүрлері»,«Қазақ халқының ұлттық киімі», «Қазақ ұлттық тағамдары», «Наурыз: Ұлыс күніне арналған халық салт-дәстүрлері», «Наурыз: Жаңғырық дәстүрлері», С. Кенжеахметұлының «Әдет-ғұрып», «Беташар», Б. Төтенаевтың «Қазақтың ұлттық ойындары», «Қазақтың батырлық жырлары», «Мәдениет», «Дәстүр» және басқа журналдар мен кітаптар бар.
Абай атындағы облыстық әмбебап кітапханасы барша оқырмандарды Ұлыстың ұлы күні – Наурыз мерекесімен құттықтайды! Береке-бірлігіміз артып, ырыс-несібеміз мол болсын! Әр шаңыраққа шаттық пен қуаныш, бақ-береке тілейміз!