Қазақ мәдениетіндегі дәстүрлі ойындар: спорт сағаты

20 наурыз Ұлттық ойындар күні, Наурызнама аясында Абай кітапханасының балалар әдебиеті бөлімінің қызметкерлері №50 IT мектеп-лицей кітапханасының қызметкерлерімен бірлесіп 3 «В» сынып оқушылары арасында «Қазақ мәдениетіндегі дәстүрлі ойындар» тақырыбында спорт сағатын ұйымдастырды.
Шара барысында Наурыз мейрамының тарихы, қазақтың ұлттық ойындары, кітап көрмесімен таныстырылды. Іс шара барысында балалар Наурыз туралы өлеңдер оқыды, «Қамажай» ұлттық биі және «Торғайлар» биін орындады, «Арқан тарту», «Асық ату», «Теңге алу» «Қол күрестіру» және т.б. ойындарға белсене қатысты. Іс- шара «Бақ мерекем, құт мерекем әз-Наурыз» атты кітап көрмесімен толықтырылды.
Кітап көрмесінде «Сіз білесіз бе?», «Алтыбақан», «Жеті қазына», «Наурызнама аталы ойлар», «Қазақ халқының салт-дәстүрлері», «Қош келдің, Наурыз!» кітаптары және қазақтың ұлттық ыдыстары мен қамшы, торсық, киіз үй, көрпе, ұлттық киім және балалардың қолымен жасалған қолөнерлері қойылды. Соңында Абай атындағы кітапхана қызметкерлері оқушыларға сыйлық таратып, сынып жетекшісі Толқын Демеуғалиқызы Солтанбековаға оқушыларды жақсы дайындағаны үшін алғыстарын білдіріп, шығармашылық табыс тіледі.