Шұғылалы Әз-Наурыз: этнографиялық кеш

20 наурыз күні Абай кітапханасының шаңырағында Наурыз мейрамын тойлау басталып та кетті. Осы жолы кітапхана мамандары Наурызға арналған ерекше үрдістегі жаңаша, әрі қызықты бағдарлама аясында қарсы алды. Халқымыздың әдет-ғұрпын, дәстүрін, тарихын білу, оны қастерлеу – әрқайсысымыздың азаматтық борышымыз десек болады.
Ұжым мүшелері «Наурызнама», «Қызғалдақ», «Бәйшешек», «Аруана», «Ынтымақ», «Наурыз нұры» топтары болып бөлініп, сайысқа түсті. «Қыз ұзату», «Бесікке салу», «Құйрық –бауыр тарту», «Абысын асы», «Тұсау кесу», «Ерулік беру» сияқты қазақтың салт-дәстүрлерінен көрініс көрсетіліп, әннен шашу шашылып, ұлттық билер биленді.
«Шұғылалы Әз-Наурыз» ұжымдық тойлау мерекесіне Абай облысы әкімінің кеңесшісі, Халықаралық «Алаш» әдеби сыйлығының иегері Ербол Алшынбай мырза ат басын бұрып құттықтап, сайысқа төрелік жасады. Сондай-ақ, әділқазылықта айтыскер ақын Дәулет Сметов, кітапхана директоры Мерей Қарт, кітапхана маманы Орынкамал Долдашқызы төрелік жасап, нақты бағаларын бере білді.
Дастархан жайылып, Әз-Наурыздың ағы Наурыз көже құйылды. Күн көктеммен бірге келіп жеткен Наурыз мейрамы құтты болсын, барша жамағат! Наурыз құтты болсын, құрметті, Әріптестер!