Қош келдің, Әз Наурыз!: әдеби – мәдени тойлау

Наурыз мейрамын тойлау мақсатында Абай атындағы кітапхана қаламыздағы Өлкетану мұражайымен бірлескен түрде қаламыздағы Орталық ашық алаңда екінші мәрте қазақ үй жабдықтады. Тігілген киіз үй – қазақтың ұлы ойшылы, ақын Абай Құнанбайұлының туғанына 180 жыл толуына орай «Абай» ауылы деп аталды.
Кітапхана ұжымы аталмыш ақ шаңқай қазақ үйді ұлтымыздың салт-дәстүрі бойынша безендіріп, келушілерді ізгі тілекпен қарсы алды.
Абай кітапханасы, Абай ауылының шаңырағына Абай облысының әкімі Берік Уәли, Семей қаласының әкімі Талғат Мұратов және т.б. ел ағалары арнайы ат басын тіреп, Наурыз мейрамымен құттықтап,кітапхана ұжымына ақ жарма тілектерін жеткізді.
Келген қонақтарды ақынның өмірі мен шығармашылығынан сыр шертетін «Адамзаттың Абайы» тақырыбындағы кең көлемді кітап көрмесі қарсы алды. Аталмыш көрме «Абай мұрасы – құдіретті сөз әлемі», «Абайдың өмірі және қоғамдық қызметі», «Абайдың ақын шәкірттері», «Абайтану. Ғылым мен зерттеу» атты бөлімдерден тұрды.
Сондай-ақ, көрме 2023-2024 жылы «Абай жолы кітапханасы» жобасымен жарыққа шыққан кітаптармен толықтырылып, ұлы ақынның қанатты сөздері жайғастырылды.
Кітапхана туралы жарқын естеліктерін есте қалдырғысы келетін оқырмандар мен қала қонақтары үшін «Абай» ауылы арнайы түрде ФОТОАЙМАҚ ұйымдастырды.